TURA: Re·anggipa Mongolbar salo, 3rd National Water Awards-ko New Delhi songjinmao ong·atanio award minggniko West Garo Hills a·ja chebaaha aro ia award-rangko New Delhi songjinmani Vigyan Bhavan-o on·angaha.
Ia award-rangko Jal Shakti-ni Minister Gajendra Singh Shekawat, Jal Shakti aro Food Processing Industries-ni Minister of State Prahlad Singh Patel, Jal Shakti aro Tribal Affairs-ni Minister of State Bishweswar Tudu, West Garo Hills a·jani Deputy Commissioner Ram Singh-ni dilanggipa dolna on·angaha.
Ia National Water Award-ni gnigipa biapko West Garo Hills a·jani Aminda Simsanggre aro gittamgipako Chambagre song cheaha.
Songo noko chiring chibisikrangko tange rakkiani, buring bolgrimrangko tange rakkiani aro mikkachirangko chimonge dingtang dingtang kamrangna jakkalna man·engani gimin ia songrang, National Water Award-rangko cheaha aro uamangna CLLMP, World Bank Project, MBMA aro MGNREGS-ni ning·o dakchakanirangko on·aha.
Ia songrang, National Water Award-ni ‘Best Village Panchayat – North East Zone’ gadango gnigipa aro gittamgipa award-rangko man·aha.
