SHILLONG: Meghalaya sorkari, Financial Year (2021-22)-o ASHA worker-rangna gamna gita kror 53 tangkako chamataha ba wataha. March 2021 tarikona man·kugija dongenggipa incentive ba man·gniko on·na, gita sorkarini tangkako wataha.
National Health Mission, Meghalaya-ni director Ram Kumar, kobor ra·timgiparang baksa agangrikmitingo indine aganataha, “March 2021-ona man·na nanggnirangko on·na gita Meghalaya ASHA Scheme (MABS)-o pangchake tangkako sorkari wataha. March 29 2022-o watgipa lekkako gimik district-rangni Deputy Commissioner-rangona watataha, District Medical aro Health Officer-rangnaba copy-ko watataha.”
Kumar-ni parakani gita, National Health Mission-ni dakchakanio Meghalaya sorkari, ASHA aro ASHA Facilitator payment mobile application-ko parakataha. Ia application-ko parakatani miksonganide, ASHA worker-rangna uamangni kam ka·anina somoi gita gamaniko altuatna parakataha. Unbaksana programme officer-rangna ASHA-rangna tangka gamaniko nirokna dakchakbegipa ong·gen.
Ia applicatioin-ko Ri-Bhoi District-ni Umling Block-kode a·bachengataha aro Ri Bhoi-ni sak 471 ASHA-rang Application-o biming segataha. Application-o uamangna lak 29.90 tangkako gamna nanganiko mesokaha, jekon salbongani gisepon application gita gamataha.
Ia application-ara sal 120-150 -oniko salbongaona komiataha.
Meghalaya ASHA Benefit Scheme (MABS) aro Meghalaya Maternity Benefit Scheme (MMBS), jekon Meghalaya sorkari bilsi 2011-12-o a·bachengataha. Manderangna nambata service ba cholko on·na miksonganio ia scheme-ko sorkari parakataha.
Indake ong·engon financial year 2018-2019-o tangka chu·ongjani gimin National Health Mission, Meghalaya, ASHA-rangna somoi gita tangkako gamna man·jaha.
Minggipin re·anggipa bilsi 2021 June jao sorkarini official aro Meghalaya ASHA workers Union, man·na nanggniko somoi gita man·jani bidingo tom·e chanchiangaha.
“Unbaksana tom·anio Meghalaya Maternity Benefit Scheme (MMBS)-ko April 2021-oni bon·atna tik ka·aha, maina iandakgipa apsan scheme ma·mong on·enga, jekai Prandhan Mantri Matru Vandana Yojana (PMMVY), jekon bilsi 2017 January jao parakataha, ine Kumar aganaha.
