Gondenggre songo a·sel ong·gipani bidingo Nokma Ronjit T Sangma talataniko on·angskaa

TURA: Gondenggre songo saksa Kenedy Marak minggipa mandeko chadrapa ine badi ka·angani ja·man, ia apsan songni Nokma Ronjit T Sangma, an·tangni kosako matnange badi ka·anirangko jegalatenba, ia a·selrangni bidingo talataniko on·angskaaha.
Gondenggre songo Kenedy Marak aro uni nokdangni manderangko Jengjal police station-ni officer-in-charge Vicky Sangma, songni Nokma Ronjit Sangma baksa nangrime sinjete roenga aro uamangko rim·na ka·mikkenatenga ine adita salrangna skangsan, West Garo Hills a·jani SP Vivekananda Singh-na seachi badi ka·doangahachim ine nikna man·a.
Police-rangni u·iatani gitade, ian songni mamlasa ong·ani gimin da·o ia case kacharini jakon ong·engpitichim.
Indake ong·engon, an·tangni kosako matnanganirangko songni Nokma Ronjit T Sangma jegalatskaenba, ua aro uni jikgipa Benji Marak-sa chengonin ia songni nokma ong·engachim ine talataniko on·angaha.
“British-rangni chasongonin angni jikgipani ma·drangrangsa nokma ong·bae angni jikgipana skangba uni ma·gipa Ginjak Marak, Gondenggre songni nokma ong·ahachim. Ia A·kingara Chambugong chatchini a·kingsa ong·a aro angni jikgipa Benji Marak-an songko chalaienggipa gita ong·a,” ine Ronjit Sangma, kobor setimgiparangna seachi parakataha.
Ronjit-ni parakatani gitade, Kenedy Marak aro gipin manderang, Gondenggre songko bakatenba Amate Jamadal A·kingko nangnike, ia a·kingni nokmana Jimbert Sangma aro uni jikgipoa Repolish Marak-ko biming segatchengani a·selsa ia golmalrang a·bachengahachim. Iani bidingo uamang GHADC-ni ning·o donggipa Land & Revenue-ni Executive Membor-ni court-o a·kangeahachim indiba uamangni a·kanganiko GHADC-ni kachari jegalataha ineba Ronjit Sangma parakataha.
Ja·mano Kenedy aro uni manderang, GHADC CEM-ni kacharionaba re·ange, iani bidingo a·kanganirangko daktaiahachim indiba kachario dolgnini kattarangko knaani ja·man Kenedy-ni a·kanganiko kachari jegalattaiaha ine Ronjit parakataha.
GHADC-ni kacharirango jegalako man·ahani giminsa Kenedy Marak aro uni manderang, songo golmal gondogol ong·atna a·bachengaha ineba Ronjit matnangataha.
“Da·o uamang an·tangtangko Gondenggre songni nokma ine a·kangna jotton ka·skaengaha indiba ian niamni gita ong·jaenga. Kacharirango jegalako man·ani ja·man da·o uamang songo noko dakgrik dinggrikanirangkosa ong·atna jotton ka·engaha. Uamango maiba neng·nikani ba ma·sina nanganirang donggenchimode uamang chubata gadangrangonasa re·ange dakchakanirangko ra·na nangachim indiba uamang chingna janggi tangani cholko on·enggipa chingni bagan bari aro ge·a gamanirangkosa nisie galskaenga,” ine Ronjit a·kangataha.
Iani bidingo Kenedy aro Jimbert, High Court-o mokordomako ka·aha ine koborko man·soahani gimin uamang songo noko dakgrik dinggrikanirangko ong·atgija kacharini rai on·anina sengna nangachim ineba Ronjit parakataha.
“Uamang kacharini rai on·aniko sengani pal chingni kosako kragija kamrangko ka·skaenga aro ian uamangni niamna aro sorkarina mande ra·gijaniko mesokani ong·enga. Da·o dipet ia mamlako kachari jako ra·engkua indiba Kenedy aro uni manderang, gipinrangni ka·sachakaniko aro dakchakanirangko man·na gitasa chingni kosako tol·e matnanganirangko dakskaenga,” ineba Ronjit parakataha.