SHILLONG: ASHA worker-rangna uamangni man·na nangkuenggipa arrear-rangko gitcham Congress sorkarini somoionin on·chipjahachim aro iana da·o ong·enggipa sorkarikosa matnangskaenga ine Sukrobar salo, a·dokni Chief Minister Conrad K Sangma parakataha.
ASHA benefit scheme-ko 2012-13 bilsirangon a·bachengatahachim ine nikna man·a.
Indake ong·engon, Congress sorkarini somoirangonin ASHA worker-rangni man·gniko gitcham sorkari on·chipjaha aro MDA sorkariko jako ra·ani ja·man ASHA-rangni man·gnirangko on·jani gimin ia sorkarikosa matnangskaaha ine Sangma parakataha.
“2012-13 bilsio gitcham sorkari, ASHA-rangna gong kror 7.8-ko gamataha indiba 2013-14 bilsiode pelsakoba gamjaha. 2014 bilsioni 2015 bilsiona uamang gong kror 10-ko ASHA-rangna gamaha indiba 2015 bilsioni 2018 bilsionade gitcham sorkari, ASHA-rangna tangka paisarangko gamsrangjaha. Bilsi bongani gisepo ASHA-rangni man·gnirang tang·dorikrikangaha aro 2018 bilsio chingni sorkariko jako ra·ahaon ASHA-rangni man·gnirangko gamjahani gimin chingkosa matnangskaaha,” ine Chief Minister aganaha.
Sorkariko rikchengoni ia Meghalaya Democratic Alliance (MDA) sorkari, gong kror 80-mangni gita grorangko chotaha aro iaoni gong kror 53-kode ia antini gisepon gamataha ineba Sangma parakataha.
Batanggimin bilsi gittamna ia sorkari ASHA-rangni man·gniko dontonggija on·enga aro ia man·gnirangara ia sorkarini somoionisan ong·aija indiba gitcham sorkarioniba ong·a ine Chief Minister parakataha.
