AMPATI: Re·baenggipa antirango bilsi 12-oni bilsi 14, bilsi 15-oni bilsi 17 aro bilsi 18 batgimin manderangna COVID-19-ni tikarangko su·ani bidingo chanchirimna gita South West Garo Hills a·jao COVID-19-na songe dongimin District Task Force (DTF)-ni tom·aniko Bristibar salo, Ampati Circuit House-o ong·atangaha.
Ia tom·aniko South West Garo Hills a·jani Deputy Commissioner SK Marak dilangaha aro tom·anio ADC AVD Shira, district administration-ni official-rang, a·jani health official-rang, medical officer-rang aro gipin officer-rangba dongpae bak ra·angaha.
Ia tom·aniko a·bachengatanio SWGH a·jani Deputy Commissioner, tom·bagipa official-rang baksa chanchirimangengon, tikarangko su·anio mai dakgipa dakchakanirangko district administration-oniko nanggen ine a·jani health official-rango sing·doangenba, tikarangko su·na skang, skulrango aro dingtang dingtang songrango awareness program-rangko ong·atchengna didiangaha.
Tika su·na chol man·enggipa bang·bata manderangkon ia chango su·na man·na gita rakbate kamrangko ka·china gitaba Marak, DTF-ni membor-rang, medical officer-rang aro health worker-rangko didiangaha.
Iana skang, SWGH a·jani District Immunisation Officer Dr Noreen Sangma-ba jinmana aganprakengon, SWGH a·jao bilsi 18 batgiminrangoni 97.4 percent-de skanggipa tikako, 68.7 percent-de gnigipa tikako aro bilsi 15-oni bilsi 17 ong·giparangoniba 62.9 percent-de skanggipa tikako aro 16.6 percent-de gnigipa tikarangko ra·manaha ine parakangaha.
Ia chang tikako su·anio bilsi 12-oni bilsi 14 ong·giparangna CorBEvax tikako, bilsi 18-oni bilsi 44 ong·giparangna COVAXIN tikako, 2004 bilsio atchigiparangnade Covishield tikako aro bilsi 60 bate gnigipa tikako su·aoni jasku ong·giminrangnade precaution dose-rangko su·anggnok ineba Dr Sangma parakataha.
Indake ong·engon, SWGH a·jao donggipa pilak PHC aro CHC-rangko tika su·chakna gita kulie donanggen aro sub-centre-rangode tikarangko su·na a·bachengataha ine district official-rang parakataha.