SHILLONG: Meghalaya a·doko adhoc skigiparangkoba deficit-ni gadangona ra·dochina gita skigiparangni dabianiko Sukrobar salo, a·dokni Education Minister Lahkmen Rymbui jegalatenba, da·o dipet Meghalaya sorkari iana maming chanchianirang dongkujani gimin chu·sokatna man·kujawa ine parakataha.
Meghalaya a·doko adhoc skulrango skigiparangkoba deficit-ni gadangona ra·doatchina gita Federation of All School Teachers of Meghalaya (FASTOM) dabiengachim ine nikna man·a.
“Adhoc gadangni skigiparangko deficit-ni gadangona ra·dochina dabianide chu·sokgipa ong·na man·jawa maina a·dok sorkario iandakgipa maming miksonganirang dongkuja,” ine Rymbui aganaha.
Indake ong·genchimoba adhoc skulrango skigiparangni dormaharangko bariatna gita a·dok sorkari, kamrangko ka·engaha ine Education Minister parakatenba, sorkarini ja·ku de·aniko skigiparang ra·chakgen ine an·tangni ka·dongchakenganiko parakataha.
Da·o dipet Meghalaya a·dokni adhoc skulrango, lower primary (LP)-ni skigiparang gong 12,000, upper primary (UP)-o head teacher-rang gong 18,000 aro assistant teacher-rang gong 16,000, secondary level-o skigiparang jao gong 20,000 ka·e man·engachim ine nikna man·a.
Adhoc skulrango skigiparangna ia dormahako 2016 bilsini September 1 tarik dipet on·engachim ineba nikna man·a.
Indake ong·engon, a·dokni SSA skulrango skigiparangna jagnini dormaharangko on·na gita a·dok sorkarini bakoniko, gong kror 68-ko State Education Mission Authority of Meghalaya (SEMAM)-na chamataha ineba Education Minister parakataha.
“Adita salrangna skangsan chingna Delhi-o gong kror 68 tangkarangko ma·mong sorkari watdapatgen ine u·iataha aro ia tangkarangko man·soahaon chinga SSA skigiparangna bangki jabrini dormaharangkoba on·na man·gnok,” ine Rymbui parakataha.
