TURA: Meghalaya a·dokni SSA skulrango skigiparang an·tangtangni man·na nangkuenggipa dormaharangko man·kujaengani gimin dingtang dingtang dake sorkarini kosako jingjengatanirangko dakengon, jingjengatenggipa skigiparangni kosako ja·kurangko de·na ka·mikkenatahani gimin Association for Democracy & Empowerment (ADE) jegalatenba, skigiparangni kosako iandake ka·mikkenatanirangko on·gija uamangni man·na nangenggipa dormaharangko on·china sorkario dabiangaha.
SSA skulrango skigiparang, re·anggipa October jaonin an·tangtangni man·na nangkuenggipa dormaharangko man·tokkujaengachim aro a·dok sorkari, skigiparangna da·o October aro November jagnini dormaharangkosan on·chengna parakatahani gimin kamrangko ka·gija sorkarini kosako jingjengatanirangko dakengachim.
Indake ong·engon, an·tangtangni man·na nangkuenggipa dormaharangko dabie jingjengatenggipa skigiparangni kosako Directorate of School Education & Literacy (DSEL)-ni gita ja·kurangko de·na mikrakataniko on·ani gimin ADE jegalatenba, skigiparangni kosako iandake sinjetanirangko on·gija uamangni man·na nangkuenggipa dormaharangko chu·gimik on·china sorkario dabiangaha.
“Meghalaya a·dok gimikni sak 12,541 SSA skigiparang, an·tangtangni man·na nangenggipa dormaharangko on·china dabie changni chang, non-cooperation movement (NCM), nisan gisimko ra·e jinma tom·ani, mombati so·e jegalani aro dingtang dingtang dake jingjengatanirangko daktokenga indiba skigiparangni man·gniko on·ani pal batesa skigiparangni kosako ka·mikkenatanirangko on·na jotton ka·enga. Iandakgipa sorkarini kamko chinga raken jegalenga maina skigiparangba nokdang donga aro indita jarangni man·gnirangko man·tokjaengani giminsa jingjengatanirangko dakna draatako man·enga,” ine ADE-ni president Dalseng Bira Ch Momin parakatenba, skigiparangni dormaharangko ta·raken chu·gimik on·china sorkariko didiataha.
