TURA: Re·anggipa antio salgnina ong·atgipa budget session-o maini gimin dingtang Electoral roll-ni gimin chanchirimna ra·angako jechakaha, iani gimin GHADC CEM Albinush R Marak talataniko on·ataha.
Marak-ni aganatani gita, da·o je kamko nichengna ba ka·chengna nangenga, uan Garorangni ma·gitcham-pagitchamrangonin ja·rikbaenggipa dakrikbewalrangko chelchakna niam-ritiko tarina ba donna nangenga. Uni giminsa Garo Customary Law (GCL)-ko pass ka·na tik ka·chengaha. Ia GCL-ko gitcham EC-on pass ka·manaha, indiba somoi re·angan baksa bon·chipangaha uni gimin ua apsan bill-ko ra·chengna tik ka·aha, ine Marak aganaha.
Indake ong·engon da·o bilo donge kam ka·enggipa EC, dingtang electoral roll-ko tariani bidingo chanchirimna tik ka·aha aro ta·raken Committee-ko songgen ineba Marak agandapaha.
Social media-o nakatgipa ‘Garo News’-o Rongrong MDC Rinaldo K Sangma-ni ‘EC, dingtang Electoral Roll-ni bidingo chanchirimna raken jechakaha’ ine agananiko Marak, ia kobor kakket ong·ja ine talatenba, GCL-ni ja·man dingtang electoral roll-ni gimin chanchigen ine agantalataniko on·aha.
