TURA: North Garo Hills a·jani skul damsao, chatro saksako kragija dake dokani gimin Hindi skigipani kosako Constitutional Rights Forum (CRF)-ni president Greneth Sangma, FIR ka·doangaha.
Ia skigipani kosako CRF-ni president, North Garo Hills a·jani Superintendent of Police (SP)-na FIR ka·doangaha aro uni FIR-o parakani gitade, Hindi subject-o poraina man·jani gimin ia skigipa, chatro saksako uni jako gol·dikchi dokahachim.
Indake ong·engon, ia chatroko dokani a·sel uni jako saknaani dagirangko unbaksa porairimenggipa chatrorangoni photo ka·enba gipinrangna watatahani gimin gipin chatro sakbrikoba ia skigipa, sing·doangaha aro ia chatrorangko skuloniko a·rikgalna ka·mikkenataha ineba CRF-ni president, FIR-o parakataha.
Gital niamo pangchake skulrango chatro chatrirangko dokna satna niam dongjahachim ine janapatengon, ia skigipani kosako niamni kri nanga gita sastirangko on·china CRF-ni president didiangaha.