TURA: A·song gimikon petrol, diesel aro LPG-ni damrang rakbatroroengoba manderangni neng·nikanirangko namatna gita maming ja·kurangko de·jaengani gimin Sombar salo, West Garo Hills a·jani Indian National Congress (INC) dol, Tura-o donggipa Congress Bhavan-o jinma tom·chimongenba, a·dok aro ma·mong sorkarini kosako jegalgrimaniko dakangtokaha.
Jinma jegalgrimaniko dakna tom·aniko ong·atanio Congress dolni dingtang dingtang dilgiparang, chong·motan Billykid A Sangma, Roger Benny A Sangma aro Youth Congress-ni dilgiparang bakko ra·angtokaha aro toni damrangko komiatna gita maming ja·kurangko de·jaengani gimin a·doko NPP-chi dilenggipa MDA sorkari aro ma·mong sorkariko matnangtokaha.
Ia tom·anio dingtang dingtang dilgiparang aganprakengon, a·songo gimikon aro mongsongbate Garo Hills-o petrol-rangni dam rakbatroroenganichi ramram manderangsa neng·nikanirangko chagrongna nangtokenga ine ta·raken toni damrangko komiatpilchina sorkario dabiangtokaha.
Jinma tom·ani ja·mano Congress dolni dilgiparang aro dolna kam ka·enggipa manderang Congress Bhawan mikkango jinma tom·enba, poster-rang aro banner-rangko ra·e a·dok aro ma·mong sorkarini kosako jegalanirangko dakangtokaha.
Ia apsan salon, INC-ni dilgiparang a·song gimikon jegalanirangko dakangahani gimin Tura-oba apsan daken Congress dolni membor-rang, sorkarini kosako jegalanirangko dakangtokaha.
