AMPATI: South West Garo Hills a·jao re·anggipa March 21 tarik dipet manianggipa Poshan Pakhwada-ko Sombar salo, Zikzak Block-ni ning·o donggipa Patijora Govt Aided Secondary School-o dingtangmancha program-ko ong·ate matchotataha.
Ia Poshan Pakhwada-ko South West Garo Hills-ni Social Welfare department-ni ning·o donggipa ICDS-ni gita manidilangaha aro ia manianiko a·song gimikon, bi·sarangko an·seng baljokgipa ong·atna miksonganio maniangahachim.
Ia Poshan Pakhwada-ko matchotatani salo dingtangmancha Recipe Competition ba bijak song·susaaniko ong·atangaha, jeon dingtang dingtang songni me·chikrang, songtangtango ge·gipa me·su samjakrangko jakkale, namnamgipa bijakrangko song·e bakko ra·angaha. Bijak song·susaanio skanggipa boksisko Shawti self help group (SHG), gnigipako Krishi Vikash aro gittamgipa boksisko Lotus SHG cheangaha.
Ia program-ko matchotatani salo, South West Garo Hills a·jani Additional Deputy Commissioner AVD Shira, mongsonggipa sokgipa ong·e bakko ra·angaha aro bijak song·susaanio chegiparangna boksisrangko suale on·angaha.
Ia tom·anio Shira, jinmana aganprakengon, sodarangara me·surango donggipa vitamin-rangko nisie galgipa gita ong·a ine soda-chi song·gipa bijakrangko cha·jachina aro be·en an·china namgipa cha·anirangkosa cha·china gita songni nokni ma·a paarangko aro skigiparangko didiangaha.
COVID tikarangko su·e ra·china gitaba ia tom·anio ua skulrango poraienggipa chatro chatrirangko aro ma·a paarangko didiangaha.
Ia program-ko ong·atanio Zikzak PHC-ni Medical & Health Officer Dr Arundhati Hajong aro gipinrangba dongpae jinmana aganprakangaha.