SHILLONG: Re·anggipa April-ni 1 tariko Ryngain samba jolo donggipa Shillong-Pynursla ramao a·arang rurongdapani ja·man, Pynursla-ni Ryngain jolrango an·cheng bikotaniko aro Laitlyngkot-oni Pynursla-ona dakanggipa ramao dal·dalgipa ro·ongrangko bretatengani gimin inquiry-ko dakchina Civil Society Women’s Organisation (CSWO) dabiangaha.
Iani bidingo East Khasi Hills a·jani Deputy Commissioner-na sedoatengon, Pynursla-ni ning·o donggipa Ryngain jolrango an·chengrangko bikotengani a·sel aro Laitlyngkot-oni Pynursla-ona dakanggipa National Highway (NH) ramao dal·dalgipa ro·ongrangko bretatengani a·sel a·arang ruronge manderangna kenchakna nanganiko ong·atenga ine CSWO-ni president Agnes Kharshiing parakataha.
Ia biaprango a·a ruronganiko champengna man·na gita ta·raken ia jolrango an·cheng bikotani aro ro·ong bretataniko inquiry dakchina gitaba ua East Khasi Hills a·jani Deputy Commissioner-ko didiataha.
Laitlyngkot-oni Pynursla songona dakanggipa biaprango an·cheng aro ro·ongrangko bikotna skang, songni manderang baksa agangrikchengama agangrikchengja, am·sandichina gitaba CSWO didiataha.