WGH-o MNREDA-ni project officer-ko niam gri songa ine FKJGP matnanga

 

TURA: West Garo Hills a·jao DC office-ni assistant director Jawairiya Islam-ko MNREDA-ni project officer songania niamni a·palo ong·a ine Federation of Khasi Jaintia & Garo People (FKJGP) Garo Hills Zone parakatenba, ia mandeko MNREDA-ni project officer ong·aoniko ra·galpilchina gita West Garo Hills a·jani Deputy Commissioner-na sedoataha.

FKJGP-GHZ-ni parakatani gitade, MNREDA-ni project officer-ni kamna songbadrango, electronic media-rango aro office-ni notice board-oba maming u·iatchenganirang dongjachim aro DC office-o saksa assistant director ong·enggipa mandeko ia kamo donataniara sorkarini kamrangna dongimin niamko pe·a gita ong·ahachim.

“Ia kamna maming u·iatchenganiba dongjaha aro ia kamna porikka ba personal interview-ko ra·aba dongjaha. MNREDA-ni project officer-nade electricals-ni gimin u·i-ma·sigipa, chong·motan Bachelor in Engineering (Electricals) donggipa mandekosa nangachim indiba ia kamo donatako man·gipa Jawairiya Islam-de electricals-ni bidingo maming u·i-ma·sigipa ong·jachim. Chingni kobor man·soani gitade, ia mande adita salrangna skangsan Guwahati University-oni Sociology-ko BA matchote re·bagipasa ong·achim aro ua ia kamna kragipa mande ong·jachim,” ine FKJGP-GHZ-ni additional general secretary Matsrang A Sangma parakataha.

Ia mandeko project officer-oniko ra·galpilchina dabiangengon, ia dabianiko chu·sokatjaskal uamang uni kosako raken jegalangkugen ine FKJGP-GHZ parakataha.

MNREDA-ni project officer-de West Garo Hills a·jani dingtang dingtang biaprangona re·e project-rangko nina aro data-rangko chimongna nanga ine talatangengon, project officer ong·enggipa mandede A·chikkuko srange aganna man·gipa ong·na nanggen ineba FKJGP-GHZ parakataha.

Get real time updates directly on your device, subscribe now.

Comments are closed.