SHILLONG: Meghalaya aro Assam a·dokni simarango ru·uta bilsirangoni meligrikgijanirangko namatna ja·ku de·anio a·dokni mitam biaprangko Assam a·doko napatna manchiengani gimin ia jolrango songdongenggipa manderang sorkarini kosako jegalanirangko daktokengon, batanggimin somoirango darang sorkarirangan ia meligrikgijanirangko namatna ja·kurangko de·jahani gimin ian MDA sorkarini chu·sokatgipa kamrangoni mingsa ong·aha ine Mongolbar salo, a·dokni Sports & Youth Affairs Minister aro Peoples Democratic Front (PDF)-ni president Banteidor Lyngdoh parakatskaaha.
Lyngdoh-ni parakatani gitade, sima arirango songdongenggipa manderangni namgninasa MDA sorkari, ia ja·kuko de·ahachim.
“Iandakgipa dal·begipa kamko ka·engon gimikankode kusi ong·atna man·jawa ine anga ku·rachakenga. Ian ia sorkarini ka·donge ja·ku de·aniko mesokani ong·aha. Ia neng·nikaniko namatna gita ja·kurangko de·chipjagenchimode da·o mikkang bilsi 50-ni gisepoba ia meligrikgijanirangko namatna man·jawa,” ine Lyngdoh aganaha.
Manderangni namgnina kamrangko ka·anio ua ka·pong ong·gipa mande ong·ja ineba Lyngdoh parakataha.
“Ia sima arini bidingo angni kosako susana sienggipa manderang, election agenda dake ra·enga ong·ode anga maina ia kamko ka·anio kenna nanggen? Indita bilsirangna meligrikgijaniko namatna gitasa sorkari ja·kuko de·aha aro iako manderangba namen ma·sia,” ine Lyngdoh parakataha.
Meghalaya a·dokni bilsi 50 gapaniko maniengani gimin ian a·dokni simarangko name sale ra·ani somoi ong·aha ineba ua parakataha.
“Bilsi 50 gapani ja·manoba Meghalaya a·dokni simarangko sale ra·na man·kujaengani gimin bang·a manderang sing·dotokenga aro iako an·ching gisik ra·na nanga. Uni gimin ia meligrikgijaniko changsanon matchotatna man·ode nambata,” ineba Lyngdoh aganaha.
Lyngdoh-ni parakatani gitade, Meghalaya sorkari, Assam sorkari aro ma·mong sorkarini gisepo nangrime kamko ka·na man·ahani giminsa ia MoU-o soi ka·grikaniko chu·sokatna man·ahachim.
Indita bilsirangna a·doko aro ma·mongo Congress dol sorkariko chalaiahaoba, a·dok damgnini simarango meligrikgijanirangko namatna man·jaha ineba ua an·tangni suk ong·gijaniko parakataha.
Mitam biaprangko Assam-o napatna tik ka·ahani gimin ia jolrango songdongenggipa manderangni suk ong·jaengani gimin sing·on, je biaprangon manderang sorkarini tik ka·aniko namniktokjaenga aro ra·chakna man·jaengachim, uandakgipa biaprangko nipiltaina man·gen indiba ia biaprangko nipiltaiengon, Chief Minister aro Deputy Chief Minister dongpana man·ode nambatgen ine Lyngdoh parakataha.
