SHILLONG: PA Sangma Fellowship for Legal & Policy Research-na Sombar salo dingtangmancha Meghalaya sorkari aro Bengaluru-o donggipa National Law School of India University (NLSIU), Memorandum of Understanding (MoU)-o soi ka·grikangaha aro soi ka·grikaniko Meghalaya a·dokni Law Minister James PK Sangma dakdilangaha.
Dolgni bakrimanichi da·o ia fellowship, NLSIU-ni chatro chatrirangna, Meghalaya a·doko research ka·anirangko dakna chol on·gnok.
A·dok sorkari aro NLSIU-ni bakrimanichi chatro chatrirangna ia fellowship-o research-rangko dakna cholko on·anisan ong·aigija Law officer-rangna aro sorkarini dingtang dingtang department-rangna dingtang dingtang program aro training-rangko ong·atna cholrangkoba on·gnok.
Ia PA Sangma Fellowship for Legal & Policy Research-na MoU-o soi ka·grikangani somoio a·dokni Law Minister James PK Sangma, jinmana aganprakengon, ian chatro chatrirangna aro dingtang dingtang department-ni officer-rangna ain aro niamrangni bidingo ma·sie ra·na dakchakani ong·gnok ine parakangaha.
Ia tom·anio NLSIU-ni Vice Chancellor Dr Sudhir Krishnaswamy-ba dongpae jinmana aganprakengon, ia fellowship-ko a·bachengate on·engani gimin a·dokni Law Minister James Sangma-ko mittelpilangaha.
MoU-o soi ka·grikani somoio dongpae bakko ra·anggipa gipin manderangara, Law department-ni Secretary Cyril V Diengdoh, NLSIU-ni Registrar Dr Nigam Nuggehali, Institute of Public Policy-ni Course Director Dr Sony Pellissery aro gipinrang ong·a.
