SHILLONG: Meghalaya aro Assam a·dokni simarango ong·enggipa golmalrangko namatna gita a·dok damgnini soi ka·grikanio Meghalaya a·dokni mitam songrangko Assam-o napatna manchiengani gimin manderangni suk ong·gijaniko kobor man·soenba, Budbar salo Opposition dolni dilgipa aro All India Trinamool Congress (AITC)-ni dilgipa Mukul Sangma, Ri Bhoi a·jani simarango donggipa Mawiong, Barapathar aro Maikhuli songrangona re·ange nieaha.
Ia songrangko nieani ja·mano kobor ra·timgipa manderang baksa agangrikengon, Assam aro Meghalaya a·dokni simarango chengonin meligrikgijanirang donga ine AITC-ni dilgipa aro a·dokni gitcham chief minister Mukul Sangma parakataha.
Ning·tue chanchichenggija Assam sorkari baksa soi ka·grikaha ine Meghalaya a·dokni Chief Minister Conrad K Sangma-ni kosako jegalatengon, Assam-ni nangnikani gitasa Conrad Sangma songgigrikaniko dakahani gimin ia MoU-o soi ka·grikanio Assam a·dokde kusi ong·enga ine AITC-ni dilgipa parakataha.
Meghalaya a·doko donggipa a·arang pilakan manderangni gamrangsa ong·a ine janapatengon, jatko dilenggipa aro jatni daka rikani pilakkon a·dok sorkari mande ra·na nanga ine Sangma parakataha.
