WILLIAMNAGAR: Garo Hills gimikon buring bolgrimrang porongrong ong·roroangengahani a·sel chirangko man·na neng·engahani gimin Garo Hills-o dal·batsranggipa Simsang chibimako ripinge rakkichina gita a·dokni Chief Minister Conrad K Sangma, Garo Hills-ni manderangko didiangaha.
East Garo Hills a·jani Chisobibra-o Simsang chibimako kabatgipa Suspension Bridge-ko kulie on·angani somoio a·dokni Chief Minister, jolo songdongenggipa manderangko didiangaha.
Ia metre 100 ong·gipa dolongko MGNREGS-ni ning·o gong kror 2.7 koros ong·e rikahachim aro ian jolo donggipa damsni songrangna namgni ong·gnok.
Ia dolongko kulie on·angani somoio a·dokni Chief Minister, mongsonggipa sokgipa ong·e jinmana aganprakangengon, ia dolongko matchotatahani gimin DRDA-ni official-rangko aro songni manderangko mittelpilangaha.
A·doko donggipa rama jal·langrangko namdapatna gita sorkari, ia bilsini gisepo tangka paisarangko bang·bate chamaha ineba ia tom·anio Conrad parakataha.
Garo Hills-o buring bolgrimrangni porongrong ong·roroangenganichi chirangko man·na neng·engahani gimin an·tangni suk ong·gijaniko parakatengon, Simsang chibimako tange rakkina gita ja·kurangko de·chakatchina ua, jolo songdongenggipa manderangko didiangaha.
Ia dolongko kulie on·angani somoio a·dok sorkarini Chief Whip Marcuise Marak, East Garo Hills a·jani Deputy Commissioner Swapnil Tembe, dingtang dingtang department-ni official-rang, songni nokmarang aro jolo songdongenggipa manderangba dongpae bak ra·angaha.