SHILLONG: Ri Bhoi a·jao bijoliko name man·rongjaengani a·sel sanna bananirangko on·anio aro ma·manti sam ba tikarangko ripinge rakkianio neng·nikanirangko man·engani gimin Meghalaya sorkari aro SELCO Foundation-ni nangrime songgipa Solar Power Energy-ko Bristibar salo, a·dokni Chief Minister Conrad K Sangma, Ri Bhoi a·jani Umsaw Nongkharai-o donggipa Health & Wellness Centre-o a·bachengate on·angaha.
Ia Solar Power Energy-ko a·bachengate on·angani somoio, Umsning-ni MLA Jason D Mawlong, Ri Bhoi a·jani Deputy Commissioner Arpit Upadhyaya, National Health Mission-ni Mission Director R Kumar, AIC SELCO Foundation-ni CEO D Ditismita Chowbay, Ri Bhoi a·jani DM&HO Dr M Syiemlieh aro gipinrangba dongpae bak ra·angaha.
Ia Solar Power Energy-ko a·bachengate on·anganio a·dokni Chief Minister jinmana aganprakangengon, bijoli dongjani somoirango sanna bananirangko aro mongsongbate sam ba tikarangko ripinge donna man·na gita ia health & wellness centre-o ia solar energy ba salni bilchi jakkalgipa bijoliko songe on·ahani gimin SELCO Foundation-ko mittelpilangaha.
A·doko an·seng baljokanirangko on·na gita sorkari, bang·a tangka paisarangko chame on·enga ine janapatengon, manderangna an·seng baljokaniko on·na gita rakbee kamrangko ka·engani gimin Chief Minister, National Health Mission-o kam ka·enggiparang, ASHA-rang aro dingtang dingtang health centre-rango kam ka·enggipa manderangkoba mittelpilangaha.
Ia apsan salon World Health Day-koba maniengani gimin ua mikkangchiba an·tangtangko on·kange manderangna dangdike on·angkuchina gita a·dokni health worker-rangko didiangaha.
