SHILLONG: Adita salrangna skang, East Khasi Hills a·jao mikkarang jimbee waanio a·arang be·anichi, an·tangtangni porikkarangko serikna man·gijagipa MBOSE-ni chatro chatrirangna porikkako setaina cholko on·gen ine sorkari official-rang u·iataha.
East Khasi Hills a·jao aro mongsongbate Pynursla jolo bang·a chatro chatrirangan, a·arang rurongdape ramarang champengatako man·ahani a·sel an·tangtangni porikka sechakgipa centre-rangona re·angna man·tokjahachim.
Koborko on·ani gitade, re·anggipa April-ni 4 tariko Pynursla joloni SSLC porikkako seenggipa sak 27 aro HSSLC porikkako seenggipa sak 3 chatro chatrirang, ramarang champengatako man·e porikka sechakgipa biaprangona sokangna man·tokjahachim. Sohra jolrangoba mitam chatro chatrirang, ramarang champengatako man·e an·tangtangni porikkarangko serikna gita man·jaha ine kobor on·aha.
Porikkako seanio mitam chatro chatrirangni mobile phone-rangko jakkalani bidingo watpripraatgipa video-rangni gimin sing·sandiatskaon, iandakgipa chatro chatrirangni kosako niamo pangchake nanga gita ja·kurangko de·aha ine MBOSE-ni official parakatskaaha.
SSLC porikkani Social Science subject-o syllabus-o man·chapgijagipa mitam question-rangko on·aha ine matnanganikoba MBOSE-ni official-rang jegalataha.
Syllabus-o donggijagipa question-rangko on·a ine matnanganiara kakket ong·ja maina re·anggipa bilsini question paper-ko nisusagenchimode question-rangsan dingtanggrikaia aro chatro chatrirangna seoke sena gita bang·en cholrangko on·aha ineba MBOSE official-rang talatangaha.