SHILLONG: West Garo Hills, Gambegre constituency-oni sak chet panterang jemangan kam on·gen ine cha·bokako man·e Mumbai-o jachange dongengachim uamangko naljokate watatpilaha.
Iako u·iatao NCP chief aro Gambegre MLA, Saleng A Sangma indake aganaha, “Angni constituency-oni sak chet ba sak chi·-gnimang jemangan bilsi 18-ba ong·kuja uamangna kam on·gen ine Mumbai-ona rimangako man·aha aro da·o uamang cha·bokako man·e jachange dongna nangaha.”
Ua a·selko ma·sie ua ta·raken ADG, Deputy Commissioner aro Meghalaya House Mumbai-o donggipa commissioner-ko agangrika-taha jemangan uamangko naljokataha, ua aganaha.
Company-ni cholgugao security guard-rang official-rangko napna aro ua panterangko grongna on·jaha aro ja·mano jasana ua panterangna cha·a-ringa aro gipin nangarangko on·ani korosko uamang gamaha, ua u·iataha.
“Ua chadamberang bilsi 18-na komigiparang ong·a aro ian bi·sako nokol itani ong·a, company-o da-rangba darangkoba kam ka·atna draana man·ja. Inan namgija dakani mamla ong·a aro jemangan chingni manderangko togiaha uamangko rim·aha uko talate on·china anga chingni ADG-ko aganaha,” ua aganaha.
Indakgipa namgija dakanirangko simsakchina ua a·dok sorkariko didiaha. A·dokni a·paloni bang·a manderang kam on·gen ine togina re·baenga aro cha-damberangko rimangenga, ian simsakna nangani ong·a aro indakgipa manderangna simsakchina ua chadamberangko mol·molaha.
“Kamni bimingo togigipa company-rang chadamberangko mikbokata. Iandakgipa togianiko u·ie ra·na nanggen. Mongsonbate kamgri ong·e donggengipa chadamberang kamni gimin aganon ta·raken gisik salata man·a aro togia cha·a man·ronga, uni gimin chadamberang namen simsakna nanga, jedakgipa kamna okamaniko nikon kamko jako ra·chengna skang name dake sandina nanga, ine mikrakataniko on·aha.
