SHILLONG: Meghalaya a·dokni skanggipa engineering college-ko da·o adita jarangni gisepon matchotnaba dongaha.
Ia engineering college-ko Mawlai-o donggipa Shillong polytechnic-o rikengachim aro ia polytechnic institute-ko da·o Meghalaya Engineering College dakskana siengahachim.
Shillong Polytechnic-ni principal WL Warjri-ni parakatani gitade, ia engineering college-ko da·o matchotna siengahani gimin adita jarangni gisepon PWD (Building)-ni gita ia building-ko college-ni official-rangna pakwate on·naba dongaha.
“Ia college nokko chingna pakwate on·ahaon chinga class-rangko a·bachengatna kamrangko ka·gnok. Chinga NEHU baksa bakrimna sienga aro course-rangko a·bachengna gitaba chinga AITC-ni approval-ko man·chengna nanggen,” ine Warjri aganaha.
Engineering college-o kamrangko nakatatani gimin janapatengon, ia college-ni skigiparang aro administrative staff-na kamrangko ong·katanide sorkarini jakon ong·engkua ine Shillong Polytechnic-ni principal parakataha.
Ia college-o Civil, Mechanical aro Computer Science course-rangchi a·bachengatgen ineba Warjri parakataha.
“Ia course mingprakon dam 60 seat-rangko donna gita proposal dongachim indiba a·bachengode course ge·prako sak 30-kosan man·chengaignok,” ine Warjri aganaha.
Ia engineering college-ko rikani da·o 95 percent-de matchotangaha ine PWD (Building)-ni Executive Engineer Ransom Sutnga parakatskaaha.