Resubelpara: Re·baenggipa mikkang bilsi 2023 election-na party-ko bilakatna re·mikkanganio Sonibar salo Rongrong MDC Rinaldo K Sangma-ni noko tom·e chanchirimanganiko dakangaha aro ua tom·anion Resubelpara Block Trinamool Congress Committee-o songaha.
Tom·anio chadamberangni dilgipa aro West Garo Hills Dadenggre constituency-oni election chakatna sikgipa Rupa Marak, sak ritcha supporter-rang baksa bak ra·angtokaha.
Uandake tom·anio, mikkang bilsi 2023 election-o Resubelpara-oni AITC-na a·bachengaoni ba ongipa gadangoni kam ka·nagiparangko seokangaha.
Pildash Marak aro Sengjrang Sangma- mangko president aro secretary post-na seokaha. Bristine Marak-ko working president aro Kalseng Marak-ko organising secretary-na seokangskaha.
“Gitcham Congress supporter-rangni tom·anio bak ra·anian chingni party-ni bilakaniko mesoka. Iamang changsao Congress-ni top dilgiparang ong·tokachim, uni gimin Resubelpara-o AITC-o bilakatna chinga ka·dongsoa ine Rinaldo aganaha.
Indake AITC-ni dilgipa Mukul Sangma-koba North Garo Hills, mongsongbate Resubelpara constituency-ona AITC-ko bilakatna re·dilenganina mittelataha.
“NGH-oni dambri constituencies-an mikkang bilsi 2023 election-o Mukul Sangma-ko bilakatgen ine ka·donganikoba parakangaha.”
Iarangni gisepo Rupa Marak, “Conrad Sangma-ni dilenggipa sorkariko sima arini bidingo a·dokni manderangko dilsretenga ine matnangaha.
“Assam baksa simani bidingo MoU soi ka·gipani bidingo an·ching Garo Hills-ni manderang apsan ong·e kam ka·na nanggen ineba agandapaha.
