WILLIAMNAGAR: Ia sal somoirango chadamberangni churing chupeke gari gorarangko salanirang batroroengani a·sel ramarango a·sel ong·anirangko nikna man·rongengani gimin chatro chatrirangna Traffic Rules-ni bidingo agan-talate on·aniko dakna gita Sonibar salo, dingtangmancha Williamnagar-ni Loyola College-o donggipa Political Science Department-ni gita awareness program-ko Loyola College-ni Bishop Mama Hall-o ong·atangaha.
Ia awareness program-ko ong·atanio Williamnagar-ni SI Traffic I/c Goera T Sangma, Loyola College-ni skigiparangna aro chatro chatrirangna aganprakengon, ramako re·ruraenggipa pilak manderangan traffic-ni niamrangko tale ma·sie ra·na nanga aro ramako re·ruraengon, a·sel nanggnirangoniko naljoke rakkina gita simsakgiparang ong·na nanga ine agan-ku·pattianiko on·angaha.
Niamrangko ma·sijani a·selsa bang·bata changon ramarango a·sel ong·anirangko nikna man·rongenga ine janapatengon, gari gorarangko jakkalenggipa manderangsan ong·aigija ja·achi re·ruraenggipa manderangba niamrangko ma·sie ra·na nangchongmota ine Sangma aganaha.
Ia program-ko ong·atanio ua Motor Vehicles (Amendment) Act 2019-ni ning·o donggipa mongsonggipa niamrangni giminba chatro chatrirangna agan-talate on·angaha.
Ia program-ko ong·atanio rimchaksoani kattarangko Political Science-ni HOD Imti Lemtur aganangaha aro mittelpilani kattarangko Department Council-ni president Alpring R Marak aganangskaaha.
