TURA: Bilsi sokkugijagipa chadamberangni, seng·gnang jik-se ra·anichi, an·tangtangni janggi tanganirangko nisie galengani gimin dingtangmancha chadamberangna iani bidingo agan-talatani aro mikrakataniko on·na gita North Garo Hills a·jani Chima A·pal songo donggipa Tengsue village organisation (VO)-ni gita awareness program-ko Chima A·pal Community Hall-o ong·atangaha.
Ia awareness program-ko ong·atanio Dainadubi PHC-ni medical officer Dr AM Sangma, North Garo Hills District Administration-ni officer Tadingchi Sangma aro North Garo Hills ICDS-ni Supervisor Susan R Marak, dingtangmancha chadamberangna, bilsi sokgija bia ka·anichi chadamberangna mai dakgipa nangchakeanirangko ra·bana man·a aro chadamberangna nangchongmotgipa dingtang dingtang kamrangni gimin agan-ku·pattianirangko on·angaha.
Ia program-ona sokbagiparangko Tengsue VO-ni president Mailina K Sangma, rimchaksoangengon, ia program-ko ong·atna gita dakchakanirangko on·ahani gimin North Garo Hills-ni district administration-ko aro ia program-o chadamberangna skie on·anggipa dingtang dingtang skigiparangkoba mittelpilangaha.
Ia program-ko ong·atanio Tengsue VO-ni secretary Noara Momin-ba jinmana aganprakengon, mikkangchiba iandakgipa program-rangko uamang ong·atangna jotton ka·akugen ine parakataha.