SHILLONG: Meghalaya a·doko gital bikotgipa ‘Lawei ba Phyrnai’ bobil dolni manderangko, so·sojengjeng ong·atani kamrangko ka·jachina aro a·doko dingtanganiko ra·bana man·na gita namgipa dilgiparangko seokskachina Meghalaya a·dokni BJP dol didiataha.
Assembly election-ko ong·atna da·o jachetmangsan dongaiaha ine janapatengon, election-ko ong·atna on·china aro namgipa dilgiparangko seoke gital sorkariko rikna on·china gita ia gital bobil dolni manderangko, BJP-ni state president Ernest Mawrie didiataha.
“So·sojengjeng ong·atani kamrangko ka·ani pal, a·doko namroro silroroaniko ra·bana man·na gita election-o namnamgipa dilgiparangko seokchina aro gital sorkariko rikna cholko on·china anga uamangko mol·molenga,” ine Mawrie aganaha.
Ia sal somoirango a·dokni manderang, neng·nikanirangko chagrongna nangtokenga ine janapatengon, a·doko bang·a manderangan kamrangko ka·e cha·na cholrangko man·jaengani a·sel a·doko namroro silroroaniko nikna man·jaenga indiba da·o election sepangahani gimin ian namgipa dilgiparangko seoke namgipa sorkariko rikna cholko on·ani somoi ong·engaha ine BJP-ni state president parakataha.
Meghalaya a·doko tom·tomaniko rakkianian BJP dolni mongsonggipa nangnikani ong·enga ine janapatengon, “Angni a·doko BJP-ni president ong·chenga intalan anga HNLC bobil dolko agangrikaniona rimbana nangnikenga ine manderangna u·iataha. Da·o HNLC bobil dol baksa agangrikna dolgnionin ku·baltitimgiparangko seokmanaha,” ine Mawrie parakataha.
“Uni gimin a·doko tom·tomaniko rakkiangna gita chingna cholko on·china anga ia gital dolkoba mol·molenga. Uamango maiba duknirang dongenga ong·ode uamang nama bewalo re·bae ching baksa agangrikechina,” ineba Mawrie aganaha.
HNLC bobil dol baksa agangrikaniko a·bachengatna gita ku·baltitimgiparangko seokani ja·man ‘Lawei ba Phyrnai’ minggipa gital bobil dolni manderang, a·dokni Chief Minister-na ka·mikkenatani kattarangko email gita watatahachim.
HNLC-ni gitcham dilgipa Julius K Dorphang-ko pattokoniko watpilchina gitaba uamang dabiataha aro ia dabianiko knachakjagenchimode LP skul nok te·sako boma gopretna gitaba ka·mikkenatahachim.
HNLC-ni gitcham dilgipa Dorphang-ko, 2017 bilsio me·chik bi·sako drae til·ekani gimin bilsi 25-na pattoko donengachim indiba ia gital bobil dolni manderang, uko pattoniko watpilenba, April-ni 9 tarik walni 10:00 bajio, Shillong songjinmani ISBT-o donggipa bus gario donbachina gita dabiatahachim.
