HNLC-ni gitcham dilgipako so·otani bidingo hearing dakaniko Apr 23-o matchotatna miksongenga

SHILLONG: Hynniewtrep National Liberation Council (HNLC) bobil dolni gitcham dilgipa Cheristerfield Thangkhiew-ko police-rangni so·ote galani bidingo gitcham Justice T Vaiphei-ni hearing dakaniko re·baenggipa April 23 tariko matchotatna miksongenga.

Ia a·selni bidingo inquiry-ko dakenggipa gitcham Justice T Vaiphei-ni Sombar salo, kobor ra·timgiparangna parakatani gitade, ia a·selni bidingo changgipin hearing dakaniko April-ni 22 tariko ong·atanggen aro ia a·selni bidingo inquiry dakaniko matchotate uni report-ko tarina gita ua April-ni 23 tariko pilak dolrang baksa apsan chanchirimaniko dakna miksongenga.

Ia a·selni bidingo April-ni 8 tarikoba hearing-ko dakangahachim aro ua salo ia Inquiry Commission, Khliehriat Police Station-ni Investigation Officer-koba sing·sandiangahachim. Ia investigation officer-ko sing·sandianio ua case diary, post mortem report aro gipin lekkarangkoba inquiry commission-na mesokataha.

Indake ong·engon, April-ni 23 tariko ia Investigation Officer, HNLC-ni gitcham dilgipako so·otanio jakkalgipa silchidarerangko, photo-rangko aro gipin nangchongmotgipa sakkirangko mesokgen ine ka·dongenga aro maming dal·a sakkirang ba ma·sidapna nanganirang dongjagenchimode commission-ni hearing dakaniko April 23 tariko matchotatna miksongenga ine Justice Vaiphei parakataha.

Sorkarini on·dapgimin somoi May 20 tarikna skangan ia commission, sorkarina report-ko on·gen ineba ua parakataha.

Ia a·selni bidingo da·o dipet ia commission-ni gita chang 20-mang hearing-ko dakahachim ine nikna man·a.

Iana skangba ia inquiry commission, ia a·selni bidingo so·otako man·gipa Thangkhiew-ni chonbatgipa depante, Thangkhiew-ni jikgipa aro Mawlai police station-ni investigation officer-koba sing·sandiangahachim.

Iana agreba, re·anggipa bilsini August 13 tariko, Shillong songjinmani Kynton Massar gittimo police-rangni chadrapaniko dilgipa East Jaintia Hills a·jani SP Jagpal Singh Dhanoa baksana sorkarini bang·a sakkirangkon ia commission sing·sandiahachim.

Ia inquiry-ko matchotna gita a·dok sorkari, re·anggipa February 20 tariko jagittam somoiko commission-na on·dapahachim.

Re·anggipa 2021 bilsini August 13 tariko HNLC-ni gitcham dilgipako police-rangni so·ote galani ja·man Shillong songjinmao ding·chaoanirang ong·katahani gimin ia a·selni bidingo judicial inquiry-ko dakchina Meghalaya sorkari ge·etangahachim.