RESUBELPARA: Meghalaya a·doko 2022-2023 bilsini Budget-ko parakatanio Ginger Mission-ko a·bachengatna parakatmanahani gimin ia Ginger Mission-ni bidingo game ge·e cha·giparangna, cooperative society-rangna aro gama ge·ani kamrango bak ong·paenggipa manderangna agan-talataniko on·na gita Mongolbar salo, dingtangmancha North Garo Hills District Horticulture Office-ni gita program-ko Resubelpara C&RD Block-ni SGSY Hall-o ong·atangaha.
Ia program-ko ong·atanio Kharkutta-ni MLA Rupert Momin, mongsonggipa sokgipa ong·e bakko ra·angaha, jeon ua game ge·e cha·giparangna e·ching ge·ani ma·manti bosturangkoba suale on·angjolaha.
Ia program-ko ong·atanio Momin, jinmana aganprakangengon, songadam nokadamrango donggipa bang·bata manderangan gama ge·anirango pangchake janggi tanggiparang ong·ani gimin game ge·e cha·giparangni janggi tangani gadangko nambatatna gita sorkari, ia Ginger Mission-ko a·bachengate, e·chingrangko ge·e cha·na cholrangko on·enga ine parakangaha.
Ia tom·anio North Garo Hills a·jani District Horticulture Officer BG Momin-ba dongpae jinmana aganprakengon, ia jolrangara e·chingrangko ge·na namgipa biap ong·ani gimin chengonin ia jolrango e·chingrangko ge·e game ge·e cha·giparang bang·en namgnirangko man·aha ine parakangaha.
North Garo Hills a·jao ia Ginger Mission-ko ra·gatna gita sorkari, dam 69 chaprimgimin songrangko seokmanaha aro kamrangko MBMA aro Horticulture Directorate-ni gita niroke ka·anggen.
