SHILLONG: Salgro salaram a·dokrangoba class 10-ona kingkingan Hindi-ko compulsory subject dakna gita ma·mong sorkarini parakatani ja·man, Hindi ba uandakgipa gipin ku·sikrangko skie ra·aniara chadamberangnan namgni ong·gen ine Meghalaya a·dokni Chief Minister Conrad K Sangma parakataha.
Chief Minister-ni parakatani gitade, Hindi ku·sikara India a·songo mongsongbatgipa ku·sik ong·ani gimin Hindi-ko skie ra·aniara chatro chatrirangna nangchongmotgipa ong·achim.
“Hindi ba gipin ku·sikrangko skie ra·aniara chadamberangna namgni ong·gen,” ine Sangma aganaha.
Gipin ku·sikrangna bate ku·tangko skie ra·anian mongsonggipa ong·na nanga ine janapatskaengon, joltangni ku·sikrangkoba am·sandie see rakkina man·na gita apsan daken ma·mong sorkari, institute-rangko kulie on·anichi joltangni ku·sikrangnaba cholrangko on·na nanga ine Chief Minister parakataha.
“Joltangni ku·sikrangko namdapatna man·na gita institute-rangko kulina tangka paisarangko on·na nanga aro apsan somoion Hindi aro English ku·sikrangko skie ra·china gita manderangko didina nanga,” ine Sangma aganaha.
Je biaprangon manderang Hindi-ko skie ra·na nangniktokjaengachim, uandakgipa biaprangode Hindi-ko compulsory dakna drana nangja ineba ua aganaha.
Salgro salaram a·dokrango Hindi-ko class 10-ona kingking compulsory subject dakchina ge·etani bidingo da·o dipet Meghalaya sorkari maming ge·etaniko ma·mongoniko man·soa dongskakujaengachim.
Salgro salaram jolo donggipa damchet a·dokrangba Hindi subject-ko Class 10-ona kingkingan compulsory dakna ku·rachakaha ine adita salrangna skangsan, Union Home Minister Amit Shah parakatahachim.
Parliamentary Official Language Committee-ni chang 37-gipa tom·bimonganiko dilangani somoio ua jinmana aganprakengon, Hindi subject-ko English subject-ni pal ra·chakchina indiba joltango jakkalgipa ku·sikrangni palde jakkaljachina ine Shah aganahachim.