SHILLONG: Shillong songjinmani Them Metor ba Harijan Colony-ko dingtang biapona apjitangani bidingo a·dok sorkari, Budbar salo Harijan Panchayat Committee (HPC)-ni dilgiparang baksa tom·e chanchirimangaha.
Tom·a matchotani ja·mano kobor ra·timgipa manderang baksa agangrikengon, Harijan Colony-ko High Level Committee (HLC)-ni recommendation-o pangchakesa gipin biapona apjitangna gita ia tom·anio dolgnian ra·chake donangaha ine a·dokni Deputy Chief Minister Prestone Tynsong parakataha.
Deputy Chief Minister-ni aganani gitade, da·o dipet Harijan Colony-o ge 342 nokdangrang donga aro uamang pilakan sorkarini kamko ka·giparang ong·achim.
“Ia colony-o songdongenggipa mitamrangde chengonin kam ka·e songdongenggiparang ong·a aro mitamrangde da·o kam ka·enggiparang ong·a,” ine Tynsong aganaha.
Ia tom·anio dolgnini chanchirimaniko Harijan Colony-o songdongenggipa manderangnaba u·iatchina gita HPC-ni dilgiparangko didiangengon, Harijan Panchayat Committee baksa changgipin tom·aniko re·baenggipa April 25 tariko ong·atanggen aro ia tom·anio uamang ning·tubate chanchianggnok ine Tynsong parakataha.
Indake ong·engon, Budbar salo sorkari baksa chanchirimaniko Harijan Panchayat Committee-ni dilgiparangba chu·ongnikaha indiba iani bidingo uamang Harijan colony-o songdongenggipa manderang baksa agangrikchenggen ine parakatskaaha.
Comments are closed.