SHILLONG: Assam aro Meghalaya a·dokni simarango ong·enggipa golmalrangko namatna gita kam ka·anio Meghalaya a·dokni mitam songrangko Assam-o napatna a·dok damgnini chief minister-rangni soi ka·grikani ja·man, Meghalaya a·dokni mitam biaprangko Assam-o napatna gita a·bachengonin Assam aro Meghalaya a·dokni chief minister-rango miksongani gnangchim ine Opposition dolni dilgipa aro All India Trinamool Congress (AITC)-ni dilgipa Mukul Sangma matnangataha.
2011 bilsio Meghalaya a·dokni gitcham chief minister Mukul Sangma, dam 23 songni bimingrangkosan Assam-na on·aiaha ine da·o ong·enggipa chief minister Conrad Sangma-ni matnanganirangna aganchakaniko on·angengon, da·o ong·enggipa sorkaride so·sojengjeng ong·enggipa biaprangkosan ong·aigija, maming so·sojengjeng ong·ani grigipa songrangkoba Assam-na on·atskaaha ine AITC-ni dilgipa matnangataha.
“Angni hisapni gitade, Assam aro Meghalaya a·dokrango napatna nanggipa songrangko Assam-sa tariaha aro ia MoU-o Meghalaya a·dokde mamingko chanchichenggija soi ka·paaiaha,” ine Sangma aganenba, ia pilakkon Assam-ni seng·gipa chief minister Himanta Biswa Sarma-sa ma·sisoe dakahakon ine matnangataha.
2011 bilsio Meghalaya sorkarini a·kanggimin biaprangko on·ani ja·manoba Assam sorkaride, kamrangko ka·sinate roengachim ine janapatengon, ua somoio Assam a·dokni chalakki dakako Meghalaya sorkari ra·chakjawa ine Assam sorkari namen ma·siachim ine Mukul Sangma parakataha.
“Ia (MDA) sorkari mamingkon ma·sijani a·sel aro Tribal manderangko chel·chakna gisik skani dongjani a·sel cha·bokako man·aha,” ineba Sangma parakataha.
Tarabari jolni gimin talataniko on·angengon, Meghalaya a·doko census ka·ako man·enggipa Mallang Salbari aro Nam Tarabari songrangko Assam-o napataha ine AITC-ni dilgipa parakataha.
Sangma-ni parakatani gitade, Meghalaya census-o ga·akgipa songrang, jekai Garojan, Watre Rongchang, Borsum, Malang Joypur aro uandakgipa gipin songrangkoba Assam-na on·ataha.
“Maini gimin song damgnikosan Assam-na on·ataiaha ine Chief Minister tol·enga?” ine Sangma sing·doataha.