TURA: Smart town project-ni kamrangna gipin biaprangoni contractor, architect aro designer-rangkosa rimbae ka·atengani a·sel Tura jillaode ia smart town project-ni kamrang sera bera ong·a gita dakenga ine Tura-ni BJP MDC Bernard N Marak, ia project-ni bidingo sing·doataha.
Marak-ni matnangatani gitade, Tura jillao ia smart town project-ni kamrang 50 percent-mangni gitasan matchotengkuachim.
“Kamrangni gimin u·igijani aro simsakgijani a·selan ia smart town project, ‘dumb town project’ ong·esa bon·chipna sienga. Kamrangko 50 percent-mangni gitasan matchotengkua ine nikna man·enga aro kamrangko gipin biaprangoni contractor, architect aro designer-rangkosa ka·atengani a·selan town-na miksonganirangko nosto ka·engaha,” ine Marak parakataha.
Kamrangko ‘nosto’ ka·enga ine an·tangni agangipa kattana toe janapatengon, Tura Chandmary, Araimile aro Ringre-o A·chikrangni ‘Dama’ gita tarina miksongenggipa street light-ko ‘Kul’ gitasa tariskaengaha ine Tura-ni MDC parakataha.
“Architect-rang ong·gija noksarangkosa tariaha aro ian manderangni nikanio nitogijani ong·enga. Ia dakgualanirangko uamang taridapnaba jotton ka·jaenga. Ia kamrangko gipin biaprangoni contractor aro designer-rangna on·ani pal, A·chikrangni gimin u·i-ma·sigipa manderangna on·skagenchimode nambatachim,” ine Marak parakataha.
Ia smart town project-ni kamrangko contractor-rangna on·ani pal jillao donggipa dingtang dingtang development committee-rangna on·skagenchimoba nambatgenchim ineba Marak parakataha.
“Contractor-rangde an·tangtangna chamgipa tangka paisarangoni 50 percent-kosan jakkale kamko ka·aigen indiba gittimtangtangni committee-rangde chu·gimik tangka paisarangkon jakkale kamko chu·sokatgenchim,” ine Marak aganaha.
Ia smart town project-ni bidingo BJP, RTI-ko ka·aha aro kamrangko name nirikkienga ineba Tura-ni BJP MDC parakataha.