TURA: East Garo Hills a·jani Dobu songo rikgipa Veterinary hospital-ko jakkalgija galchipe donengani a·sel songni nokni manderang, an·tangtangni jilla kaanirangko sanna banna man·jae neng·nikanirangko chagrongna nangtokenga ine Williamnagar-ni Niksamso A·chik Society (NAS) parakataha.
NAS-ni general secretary Premiar N Sangma-ni parakatani gitade, Dobu jolrango songdongenggipa manderangni jilla kaanirangna sanna bananirangko on·na miksonge ia Veterinary hospital-ko 2017 bilsion rikmanahachim indiba ia hospital-ko da·onan jakkalgija galchipe donengani a·sel songni nokni manderang, an·tangtangni jilla kaanirangko sanna banna gita Williamnagar-onasa re·rurana nangtokskaengachim.
“Dobu songo veterinary hospital-ko man·ahani gimin songni manderang kusi ong·tokengachim indiba ia hospital-ko rikmanaoni da·o bilsi 5 ong·pilengahaoba ia hospital-ko jakkalgija donchipengani gimin suk ong·gijaniko paraktokengaha,” ine NAS-ni general secretary parakataha.
Indake ong·engon, Dobu jolrango songdongenggipa manderang, chel·a biaprangchi re·na nanggijan biaptango an·tangtangni jilla kaanirangko sanne banne ra·na man·na gita ia veterinary hospital-ko ta·raken chalaichina NAS, a·dokni Animal Husbandry & Veterinary Minister-na sedoataha.
