Thomas, ‘input distribution of ginger’ programko parakate on·a

TURA: West Garo Hills District Horticulture Officer, batanggimin April 12 tariko Rongram-o Ginger Mission, Spice Development Scheme 2022-2023-ni gita input distribution for quality ginger production programme-ko ong·atangaha. Jeon Chief Minister-ni Advisor Thomas A Sangha, MCCL-ni vice-chairman Dabo M Marak baksa chief guest ong·e bak ra·angaha.
Tom·anio bakko ra·e aganprakatengon, Thomas, e·ching game ge·e cha·giparangni chagronggipa dingtang dingtang neng·nikarangko janapate, sorkarni parakatgipa Ginger Mission-ni gimin agantalate on·aha. Ia mission-ko e·ching game cha·giprangko dakchakna miksonganiko a·bachengataha. Uandake dal·dalgipa trader ba bading-chiwalgiparangko salbana nanggniko jajrengataha. Maina bading-chiwalgiparangko man·osa e·ching game cha·giparang, uamangni game ge·e man·gipa e·chingko kragipa damo palna man·gen, indake Thomas, game cha·giparangko rakbate kam ka·china didiataha.
Tura Municipal Board-ni Chairman JD Sangma, tom·anio bak ra·e aganprakataon, e·chingko sam-bolna jakkalani gimin aro Garo Hills-oni e·chingko China aro Dubai-o namniktoka ine aganaha.
Programme-o West Garo Hills Horticulture-ni Assitant Director-ba aganprakataon, district-o 1200 e·ching game cha·giparang donga, uamang 70 percent local aro 30 percent improve variety-ko ra·gataha, ine aganaha.
Uandake Garo Hills a·jaoni Agriculture-ni Joint Director A Ch Momin, rimchaksaoni kattarangko aganaha aro District Horticulture Officer AWM Sangma, mittelpilani kattarangko aganangaha.