SHILLONG: Assam aro Meghalaya a·dokni simarango ong·enggipa golmalrangko namatna gita ja·kuko de·anio a·dokni district council-rang aro songni nokni dilgiparang baksa maming agangrikchenganirang dongjaha ine Khasi Hills Autonomous District Council (KHADC) aro dingtang dingtang songni dilgiparang parakatenba, a·dok damgnini soi ka·grikgipa MoU-ko Sombar salo jegalgrimtokaha.
Iani bidingo KHADC-ni dilgiparang, sima jolrango donggipa dingtang dingtang songni dilgiparang baksa ‘Border Council’ tom·aniko Sombar salo ong·atangenba, a·dok damgnini soi ka·grikgipa MoU-ko jegalgrimtokaha.
Ia tom·anio KHADC-ni pal, Deputy Chief Executive Membor (CEM) Gigur Myrthong, gitcham CEM aro Congress-ni MDC PN Syiem, KHADC-o songako man·gipa MDC Bindo M Lanong aro Elaka Administration-ni Executive Membor Jambor War bakko ra·angaha aro simarango donggipa songni pal, Jirang, Mylliem, Nongspung, Nonglang aro Jyrngam songni dilgiparang bakko ra·angskaaha.
KHADC-ni ning·o donggipa Elaka Administration-ni Executive Membor Jambor War-ni kobor ra·timgiparangna parakatani gitade, iani bidingo KHADC-ni dilgiparang, re·baenggipa April 26 tariko, dingtang dingtang songni dilgiparang baksa tom·e chanchirimangtaigen.
“Sima arirango ong·enggipa obostarangko namatna kam ka·anio Meghalaya sorkari, a·a nokgiparang, songni dilgiparang aro district council baksa agan-chanchirimchenggijasa Assam sorkari baksa songgigrike MoU-o soi ka·aha indiba ian niamni a·palo ong·engani gimin chinga iako maming dakeba ra·chakna man·jawa,” ine War parakataha.
Iani bidingo UDP-ni dilgipa aro songako man·gipa MDC Bindo M Lanong-ba an·tangni suk ong·gijaniko parakatengon, a·dok sorkarini chanchichenggija MoU-o soi ka·anichi simarango donggipa manderangsa neng·nikanirangko chakna nangengani gimin pilakan ia MoU-ko ra·chakna man·tokjaenga ine parakataha.
“Meghalaya sorkari, niamrangko ja·rikgijasa kamko ka·aha aro iachi maming dakeba a·dok damgnini gisepo ong·enggipa golmalrangko namatna man·jawa, batesa manderangni gisiko ding·chaoatanikon ra·bagen. Iako sorkari namatpilna man·genchimode nambatgen aro iana chinga raken kamko ka·gen,” ine Lanong aganaha.
