Garo Hills-o picnic cha·na re·ange chadambe sakgittam chio gimaa, sak 2-ko man·pilkuja

TURA: Jisu Kristoni siaoni chakatpilaniko maniani bak gita Sombar saloba bang·a manderangan Garo Hills-ni dingtang dingtang biaprango picnic-rangko cha·tokaha indiba ia salo rasong gribee chadambe sakgittam chio gimana gita nangaha. Ia chadambe sakgittamoni saksani manggisikode Sombar salon man·pilaha indiba gipin sakgnikode man·pilkujaengachim.
Pangna bilsian Garo Hills-o Easter ba Jisu Kristoni chakatpilaniko manina gita manderang chisamrangona re·e jinma cha·rim ringrimanirangko dakronga indiba jinma cha·rim ringrimanirangko dakanio chadamberang skatang chirango aue roenba chio gimaanirangko nikna man·rongengachim.
Uandaken, ia chang Sombar saloba Garo Hills-ni biap damgittamo iandake a·sel ong·anirangko nikna man·taiaha.
Skanggipa a·sel ong·anio Gondenggre songni bilsi 16 ong·gipa Niksrap Sangma, Rongkem jolona re·ange, Simsang chisamo picnic cha·engmiting somoio chio gimaaha ine kobor on·aha. Ia a·selni bidingo police-rangna kobor on·ata bakan Fire & Emergency Service-ni sipairang ua biapona re·ange, songni manderang baksa chio gimagipa chadambeko sandina a·bachengatahachim. Indake ong·genchimoba police-rangni u·iatani gitade, ia koborko seatengmiting somoiona kingkingan ia chadambeko man·pilkujaengachim.
Gnigipa a·sel ong·anio North Garo Hills a·jao donggipa Chitukona Damas songoni chadambe saksa Senja D Shira-ba Chichra/Manda chiringona picnic cha·na re·ange chio gimaaha ine kobor on·aha. Iani bidingo police-rang Sombar attamni 2:00 bajimango koborko man·soenba, ia biapona re·angahachim indiba biapona sokangon police-rang, ia chadambeni sigimin manggisikosa nikeaiaha.
Ia a·sel ong·aniko mikrongtangchi nikgipa manderangni kobor on·ani gitade, ia chadambe chiona chokonangaonin chioni nadobapiljahachim aro ja·mano sambao donggipa manderangsa uko sandie uni sigimin manggisiko man·aiaha.
Indake ong·engon, gittamgipa a·sel ong·anio South Garo Hills a·jao donggipa Eringgre songni bilsi 18 ong·gipa John Clitszer Marak, Sombar attamchibara 3:00 bajimango Aginma Fish Sanctuary-ona jroe rona re·angahachim indiba ua chio gimaaha ine kobor on·aha.
South Garo Hills Police-rangni kobor on·atani gitade, ia chadambeko police-rang sandiengoba ia koborko seatengmiting somoiona kingkingan man·pilkujaengachim.
Ia sal somoirango mikkarang warongengani a·sel bang·bata chiringrangan ta·rakbatengachim aro iani giminan manderangko skatang chio ong·onjachina gita mikrakatanirangko on·engachim.