SHILLONG: Assam aro Meghalaya a·dokni damdok sima jolrangko namatna gita dolgni sorkarirangni songgigrikaniko dingtang dingtang dolrang aro sima jolrango songdongenggipa manderang jegaltokengon, da·o bangki dongenggipa damdok jolrangkoba namatna gita bakan Assam sorkari baksa agangrikna nangnikenga ine a·dokni Deputy Chief Minister Prestone Tynsong parakatskaaha.
Deputy Chief Minister-ni parakatani gitade, ia gnigipa bakni bidingo agangrikaniko a·dok sorkari, Block I aro II baksana Khanduli jolni dilgiparang baksa agangrikanichi a·bachengatna miksongenga aro iani bidingo Meghalaya sorkari, Assam baksa apsan am·sandianirangko dakna tik ka·grikmanaha.
Gnigipa bakni bidingo agangrikaniko a·dok damgnini chief minister-rang tik ka·grike a·bachengatgen ineba Tynsong parakataha.
Damdok jolrangni bidingo a·dok damgnini songgigrikgiminko nipiltaina nangani katta dongjaha ine janapatengon, a·dok damgnini songgigrikanio bang·a bang·ja neng·nikanirangde dongaigen indiba a·dok damgnian namnikgrike songgigrikmanaha ine Tynsong parakataha.
Golmal ong·enggipa damdok jolni 26 sq km a·arangko Meghalaya aro Assam a·dokni gisepo apsangrik ong·en sualgrikaha ineba ua aganaha.
Manderangni a·ako a·dok sorkari, Assam-na pakwate on·na man·ja ine KHADC-ni agangipa kattarangni gimin janapatengon, ia a·arangara mikkangchiba nokgiparangnin ong·aigen aro iako sorkari maming dakeba kal·akjaenga ine Deputy Chief Minister parakataha.
“A·arang Meghalaya-o ong·ode ia a·ani nokgiparang Meghalaya a·dokni manderangan ong·aigen aro Assam-o ong·ode Assam-o songdongenggipa manderangnin ong·aigen,” ine Tynsong talatangaha.
Itihasko nipile dongaigenchimode a·dok damgnini simarango ong·enggipa golmalrangko namatchipna man·jawa ineba ua aganaha.
2011 bilsio Meghalaya a·dokni a·kanggipa a·arangni bidingo Assam-na on·atna skang, Meghalaya a·dokni gitcham chief minister Mukul Sangma, Cabinet baksa chanchirima dongjahachim ineba Tynsong matnangataha.
“Ua an·tangsa a·dokni a·kanggipa biaprangko segataha aro iani bidingo chingna u·iatchenggija Assam-na on·ataiaha,” ine ua aganaha.
Ia obostani bidingo politics kal·jachina gita Mukul Sangma-ko mikrakatengon, ua an·tangan bilo ong·engmiting somoioba Maikhuli-o donggipa gopramni bidingo mamingkon dakna man·jahachim ine Deputy Chief Minister parakataha.
