SHILLONG: India a·songni pilak opposition dolrangkon nangrime BJP-ni kosako chakatchina All India Trinamool Congress (AITC)-ni president Mamata Banerjee-ni didiatani ja·man, Meghalaya a·dokoba AITC, Congress dol baksa nangrime kamko ka·na man·ama man·jawa, uko tik ka·china gita AITC-ni Meghalaya unit, AITC headquarter-ni dilgiparango pakwatatskaaha.
Sombar salo, AITC-ni state president Charles Pyngrope-ni parakatani gitade, Meghalaya a·doko AITC aro Congress dolni nangrime kam ka·aniko AITC-ni high command-sa tik ka·anggen.
AITC-na cholrangko sanditimgipa aro I-PAC-ni dilgipa Prashant Kishore, BJP-ni pal gipin nambata cholko ra·bana sandienga ine janapatengon, Congress dolo dilgiparang dongjagenchimoba India a·songo pangchakani donggimin dol ong·ani gimin ua TSR aro YSR Congress gita dakgipa dolrangko nangrimatna jotton ka·enga ine Pyngrope parakataha.
BJP dolni kosako opposition dolrangni nangrime kam ka·aniko Congress dolni dilgiparangba namnikpaenga indiba mikkangchi iandake a·songo apsan bakrimaniko dilna gita Congress dolan mongsonggipa dol ong·engani gimin mongsonggipa daitoko ra·na nangnaba gnang ine Congress dolni dilgiparang parakskaaha.
“Uni gimin ia miksonganiara nangrimgimin dolrangko bikotna miksonganian ong·enga aro ian mikkangchi sorkariko chalaigipa dolrangba ong·na man·aigen,” ine Pyngrope aganaha.
Meghalaya a·doko AITC dolko bilakbatatna gita AITC-ni dilgipa Abhishek Banerjee, re·baenggipa April 22 tariko Meghalaya a·dokona re·bana siengachim.