AMPATI: Azadi Ka Amrit Mahotsav-ni bak gita Mongolbar salo, South West Garo Hills a·jani District Medical & Health Office (DM&HO)-ni gita Ayushman Bharat Block Health Mela-ko Zikzak Block-ni ning·o donggipa Garagre UP School kal·chakramo ong·atangaha.
Health department-ni gita on·enggipa dingtang dingtang scheme aro sanna banani cholrangni bidingo songni nokni manderangna u·iatna gita block health mela-ko April 18 tarikoni 22 tarikona dingtang dingtang block-rango ong·atengachim ine nikna man·a.
Zikzak Block-o ia Block Health Mela-ko ong·atanio South West Garo Hills a·jani Additional Deputy Commissioner AVD Shira, mongsonggipa sokgipa ong·e bakko ra·angaha aro ia program-ko ong·atanio ua National Deworming Day program-koba a·bachengate on·angjolenba, skulchi re·enggipa bi·sarangna Albendazole tablet-rangko on·angaha.
Ia Health Mela-ko ong·atanio Shira, jinmana aganprakangengon, skangni somoirangode iandakgipa sanna banani cholrangko man·pajachim indiba ia sal somoirangode sorkari, iandakgipa program-rangko ong·ate songni nokni manderangna an·seng baljokaniko on·na jotton ka·enga ine talatangenba, sorkarini on·enggipa iandakgipa cholrangko ra·china songni manderangko didiangaha.
Noko tarigipa sam ba A·chik samrangosan pangchakaigija gital chasongni sanna banani cholrangko ra·china gitaba ua songni manderangko didiangaha.
COVID-19-ni tikarangko ra·kugijagipa chadamberangko aro skulo poraienggipa chatro chatrirangko, tika su·e ra·china gitaba Shira ia tom·anio didiangaha.
