TURA: Re·anggipa Sombar salo, East Garo Hills a·jani Samanda Rongkem-ona picnic cha·na re·ange Simsang chibimao gimagipa chadambe saksani manggisiko Budbar pring 8:00 bajimango man·pilaha.
Ia chadambeara Gondenggre songoni bilsi 16 ong·gipa Niksrap T Sangma ong·achim aro ua salo ua, picnic cha·na re·ange chio jroe roengmiting somoio gimaahachim.
Uni gimaani ja·man, East Garo Hills a·jani police-rang, songni manderang baksa salgnina uko sandibeahaoba man·jahachim indiba Budbar pringo ia chadambeni manggisiko ia chibimaoniko man·aha ine kobor on·aha.
Ia chadambeni manggisiko man·ani ja·man post mortem ka·na gita Williamnagar Civil Hospital-ona ra·angaha.
Indake ong·engon, ia chadambeko sandianio pilak nanga dakchakanirangko on·ahani gimin East Garo Hills a·jani Superintendent of Police (SP) songni manderangko mittelpilataha.
Ia sal somoirango mikkarang warongengani a·sel bang·bata chiringrangan ta·rakbatengachim aro iani giminan manderangko skatang chio ong·onjachina gita mikrakatanirangko on·engachim.
