SHILLONG: Meghalaya a·dokni gitcham Chief Minister JD Rymbai, Bristibar salo Shillong songjinmani Mawlai Mawdatbaki-o donggipa an·tangni noko a·gilsakko watangaha. Ua bilsi 87 ong·ahachim.
Rymbai sagi, 1983 bilsio politics-o napchengaha aro ua bilsion ua Meghalaya Legislative Assembly-ni election-o Jirang constituency-oni susae seokako man·chengahachim. MLA-na seokako man·ani ja·man apsan bilsion uko Assembly-ni Deputy Speaker-na seokaha.
Uni Meghalaya a·dokna aro constituency-tangna kakket ong·e kamko ka·anichi ua 1993, 1998 aro 2003 bilsirangoba Jirang constituency-o MLA-na seokako man·taiaha. 1993 bilsio Rymbai sagi-ko Assembly-ni Speaker-na seokaha aro uni ja·man 1998 bilsionin ua sorkario dingtang dingtang department-ni minister ong·e kamko ka·angaha.
Rymbai sagiko, 2006 bilsini June 15 tariko Meghalaya a·dokni Chief Minister-na seokaha aro ua 2007 bilsini March jaona kingking Chief Minister ong·e a·dokna dangdikangaha.
Rymbai-ni siangani ja·man, Meghalaya a·dokni Chief Minister Conrad K Sangma aro dingtang dingtang dilgiparang, an·tangtangni kalimpaaniko parakattokaha.
“An·ching a·dokni gitcham Chief Minister JD Rymbai-ni siani koborko man·soe anga namen duk man·beaha. Ua a·dokni saksa dal·gipa mande ong·achim aro uni dangdike on·anggipa bang·a manderangan una ka·sabeachim. Meghalaya a·dokni namroro silroroanina uni ka·anggipa kamrangko pangnan gisik ra·kamgen. Uni janggi jringjrotna tom·tomao neng·takchina,” ine Chief Minister Conrad Sangma, social media-o parakataha.
