SHILLONG: Meghalaya a·doko joa kal·aniko legalise ka·na ba niamo ong·atpiltaina a·dok sorkari ja·kuko de·ahaoba ian a·doko songdongenggipa manderangnade ong·jawa aro gipin a·dokni manderang, jemangan KYC lekkarang dongachim, uamangsan kal·na man·aigen ine a·dokni Law aro Taxation Minister James PK Sangma talataniko on·angaha.
A·doko joa kal·aniko niamo ong·ataniara songsalna nangchakeaniko ra·bagen ine a·doko songdongenggipa manderang matnangtokengani gimin Law Minister, ia talataniko on·angaha.
A·doko Meghalaya Regulation of Gaming Ordinance 2021-ko 2021 bilsini February 21 tariko pass ka·ani ja·manon internet gita joa kal·aniko a·bachengna kamrangko ka·chakatahachim ine nikna man·a. Ia gital niamara Meghalaya Prevention of Gambling Act 1970-ko pe·e a·doko joa kal·aniko niamo ong·atna gita niamrangko gital dake tariskaahachim.
“Iana dingtangmancha licence-rangko on·gen aro ia licence-rango pangchakesa manderang, internet gita ba internet gita ong·gijaba joarangko kal·atna man·gen,” ine Sangma aganaha.
Ian Meghalaya a·dokna GST-ni gita kajinarangko man·dapna dakchakanisan ong·aigija kamrangko ka·e cha·na cholrangko on·ani gitaba ong·gen ine Minister aganaha.
Ia joarangko Meghalaya sorkari an·tangde chalaijawa indiba niamrangkosa on·aigen ineba Sangma parakataha.
Salgro salaram a·dokrango joa kal·aniko niamo ong·atchenggipa a·dokrangoni Sikkim aro Nagaland a·dokni ja·man Meghalaya a·dokan gittamgipa ong·engahachim.
