BAGHMARA: Mandeni sabisi sakanchirangko sanna bananio ja·manchakjana gita seng·gnangan porikka ra·e an·tangtangko sanne banne ra·china gita South Garo Hills a·jani Baghmara C&RD Block-ni ning·o donggipa Emangre Songmong songo Block Health Mela-ko ong·atanio, songni manderangko didiangaha.
Ia Block Health Mela-ko ong·atanio Baghmara Block-ni BDO Pilot R Marak, tom·bagiparangna aganprakengon, manderangni namgnina ra·gate on·enggipa pilak sorkarini scheme aro program-rangkoba, an·tangtangni namgnina ra·china gita songni manderangko didiangaha.
Ia mela-ko ong·atanio South Garo Hills a·jani DMCHO, Dr RC Marak-ba jinmana aganprakengon, an·tangtangko an·seng baljoke rakkiani cholrang, COVID-ni tikarangko su·ani aro dingtang dingtang sanna bannani cholrangni gimin manderangna agan-talate on·angaha.
Ia Health Mela-ko ong·atanio, South Garo Hills a·jani DM&HO Dr Perosh R Marak, Dr Attenbirth Sangma, Dr Augusta Kasri Momin aro gipinrang, manderangna sanna bananirangko on·angskaaha.
Ia mela-ko ong·atanio Yoga Instructor Farrah Sangma, Yoga-ko kal·ani bidingo talate on·angan baksana Yoga-koba manderangna dakmesokangaha.
Ia program-ko ong·atanio Monika Momin, gitrangko ring·e manderangko an·saoatangskaaha.
