TURA: All Meghalaya 4th Teachers Association (AM4thTA) Garo Hills Unit-ni tom·bimonganiko re·anggipa Sonibar salo, Asanang Adhoc UP School-o ong·atangaha aro ia tom·anio skigiparang, jinma tom·e chanchirimangenba, skigiparangni dormahako sorkari bariatchipjagenchimode sorkarini kosako bilakbate jingjengatanggen aro nanga ong·ode High Court-o dakgrikgen ine tik ka·e donangaha.
Assistant teacher aro 4th teacher-rangni poraiani gadang aro kamrang apsan ong·genchimoba dormaha man·anirangde apsan ong·jaenga maina 2013 bilsini April 1 tarik dipet assistant teacher-rang gong 9000/- dormahako man·ahaoba 4th teacher-rangde gong 6000/-kosan man·aiachim aro 2017 bilsini January 1 tarik dipet SSA assistant teacher sakgittamde gong 20,493/-ko man·engoba 4th teacher-rangde da·onan japrako gong 12,000/-kosan man·engkuani gimin 4th Teacher-rangna gipin skigiparang gitan kamni gri dormahako bariatchina dabitokengachim ine nikna man·a.
Iani bidingo association-ni gita a·dokni Governor, Chief Minister, Education Minister aro gipin dilgiparangna changni chang sedoatahaoba sorkarioni aro dilgiparangoni maming aganchakanirangko man·skakujaengachim.
“Chingni RTI-na DSEL-ni aganchakani gitade, da·o dipet 4th Teacher-rangna japrako gong 12,000 ka·e dormahako on·anio sorkari, gong 1,82,25,000-ko koros ka·na gita nangenga aro chingni dormahako 20,000-ona bariatgenchimode japrako gong 3,04,20,000-san ong·engani gimin jao gong 1,21,68,000-ko koros ka·na nangdapengachim. A·dokni Education Minister Lahkmen Rymbui an·tangan re·anggipa 2021 bilsini December jao, 4th teacher-rangni dormahako bariatna ku·rachakahachim indiba ua an·tangni ku·rachakaniko chu·sokatchipkujaenga. Gipin skigiparang, jekai SSA assistant teacher, adhoc Upper Primary teacher aro deficit teacher-rang baksa tosusagenchimode chingna jao gong 12,000 dormahako on·aniara namen kragijani aro chingko mikchepani ong·enga,” ine AM4thTA GHU-ni president Tengsrang K Sangma parakataha.
Education Minister-ni ku·rachakaniko man·e 4th teacher-rang an·tangtangni dormahako bariatgnok ine ka·donge nisengtokengachim indiba budget session-ni ja·manoba 4th teacher-rangna maming ka·donganiko sorkari on·na man·kujaenga ineba Sangma parakataha.
“Uni gimin chingni dabianiko sorkari knachakteljagenchimode chinga bilakbate jingjengatangna aro sorkarini kosako High Court-o dakgrikna tik ka·aha,” ine AM4thTA GHU-ni president parakataha.
