SHILLONG: Assam aro Meghalaya a·dokni gisepo songgrike soi ka·grikgipa Memorandum of Understanding (MoU)-ko name nipiltaichina dabiani bidingo a·dok sorkari maming aganchakanirangko on·jaengani gimin da·o iani bidingo an·tangtangni gisepo chanchirimna gita NPP-chi dilenggipa MDA sorkario bak ong·enggipa United Democratic Party (UDP) manchiangaha.
“Assam sorkari baksa soi ka·grikgipa MoU-na chinga suk ong·gijaniko parakmanahani gimin chinga an·tangtangni gisepo iani gimin chanchirimna tik ka·angaha. Iani bidingo chinga an·tangtang chanchirimchengenba ja·mano sorkari baksa agangriktaigen,” ine Robibar salo, UDP-ni general secretary Jemino Mawthoh parakataha.
Mawthoh-ni parakatani gitade, a·dok damgnini simarango so·sojengjeng ong·aniko namatna gita ja·ku de·anina uamang kusi ong·a indiba mitam biaprangko Assam-o napatna tik ka·ahani gimin uamang kusi ong·jae, iako nipiltaichina gita sorkariko didiengachim.
“Chinga gimik biaprangni giminde aganjaenga indiba je biaprangon manderang kusi ong·tokjaengachim, uandakgipa biaprangni bidingo nipiltaina nangengani giminsa iako aganenga,” ine UDP-ni dilgipa aganaha.
UDP-ni gita uamang an·tangtangni nangnikaniko nipiltaichina dabienga aro KHADC-ni CEM, jean UDP-ni working president-ba ong·achim, uamang district council-ni gita nanganirangko sorkarina u·iatmanaha ine Mawthoh parakataha.
“NPP dolan MDA sorkariko dilengani gimin MDA-o bakrimenggipa gipin dolrangni nangnikanikoba knachakchina,” ine ua aganaha.
Ia obostani bidingo AITC dolni, UDP aro gipin dolrangko matnangenggipani gimin janapatengon, “Mukul-de gimikkon matnangrongaia indiba ian kraani ong·ja maina chingaba jegalna nanga gita jegalanirangko dakenga,” ine Mawthoh parakataha.
Meghalaya a·doko Trinamool Congress (TMC)-ko manderang ra·chakna man·tokjaengani giminsa ia obostani bidingo politics kal·na jotton ka·enga ine matnangatengon, “Uamang ia cholko ra·esa an·tangtangko mesokna jotton ka·enga aro manderangna an·tangtangko kam ka·enga ine mesokna jotton ka·enga. TMC-ni dilgiparang pilakan skangode Congress dolni dilgiparangsa ong·achim aro Congress sorkarini somoio uamang maiko dakskaaha?” ine UDP-ni general secretary sing·doataha.