SHILLONG: AITC aro gipin party-rang baksa bakrimenba, NPP-ni re·dilenggipa MDA Sorkariko United Democratic Party (UDP) be·gruatna jotton ka·enga ine jangatgipa kattarangko UDP jegalataha aro somoi bon·aona kingkingan MDA baksa bakrimanggen ine agandapaha.
“Janggipa kattarangko ong·susu nikoba ian kakket ong·ja, ian manderangko jajaatna jangatgipa kattarangsan ong·aia. Angni aganako knabo, UDP pangnan ku·cholsan ong·aniko kim·kimaniko rakkigipa ong·a, batanggimin bilsi brio sorkariko rikanio chinga kim·kima mangrake dongaha aro bilsi bon·aona kingking apsanan dongangkugen. Chinga ong·kate katgen ine chanchiama?” UDP general secretary Jemino Mawthoh aganaha.
Janggipa kattarang gita dake UDP-ni miksongani dongja, ian manderangko jajaatna jangatgipa kattarangsan ong·aia ineba Mawthoh aganaha.
Sorkariko rikanio UDP-ni kamrangni bidingo sing·anina aganchakengon, ‘‘Sorkarini pilak kamrangon chinga ma·sirikna man·a maina pilak kamrangko meli nangrime ka·enga. Memborrang bang·jaoba, nangani kri chingni nambatako on·e aro chanchie kamrangko ka·enga,’’ Mawthoh aganaha.
“Chinga mikkangchiba indaken kamrangko ka·angkugen aro chingni kamrangko manderangan nichina. UDP an·tangni mangsonganio mangraka aro mikkang 2023 poll-ode dingtang susagen,” ua agandapaha.
AITC baksa bakrime susana gita UDP-o maiba miksonganirang dongama ine sing·anina aganchakengon, AITC da·odipetona indakgipa re·mikkangbaanirang dongkuja, Mawthoh aganaha.
