Rice scam-ni mamlako sandiani matchotnasiengjok

SHILLONG: Rice scam ba a·dokona merong ra·baanio cha·boke cha·ani mamlako Justice (retd) Mool Chand Garg-ni skotong ong·e sandidilgipa independent inquiry commission, uamangni sandie man·gipa report-ko A·dok Sorkarina pakwatna bang·e somoi nangjawaha.
Koborrango parakani gitade, Inquiry Commission uamangni sandianirangko dakaniko ru·utgijan matchotatnasiengaha aro ru·utgijan A·dok Sorkarina uamangni report-ko on·gnok.
Inquiry Committee, re·anggipa February 16-19 tarikrango Meghalayaona wenbaaha. Dolsa Garo Hills-ona wenangaha, aro dolgipin Khasi-Jaintia Hills region-ni dingtang dingtang biap a·damrangona wenroroe sandianirangko dakangahachim.
Ia dolgnian dingtang dingtang Integrated Child Development Services (ICDS) centre-rangon wenroroaniko dakenba child development project officer-rang baksa agangrikanirangkoba dakangaha.
Iang dolgnian dingtang dingtang sing·anirangko dakangaha aro beneficiaries ba merongrangko man·enggiparangko, uamangni aganchakanirangko on·china gita aganangaha, uni ja·mano Committee, uamangni aganchakanirangko niaha, jerangkon committee, adita somoirangna skango panel-na pakwatangaha.
Indake ja·mano, Social Welfare department-ni sakbri officer-rango Commission, New Delhi-o sing·anirangko dakangahachim.
A·dokona merongrangko ra·baanio cha·boke cha·anirang ong·enga ine matnanganirangko dakani gimin, chong·mot a·selrangko ma·sina man·na gita jagitele sandianiko dakchina, A·dok Sorkari da·sikkari June jao retired Justice Mool Chand Garg-ni ning·o dolsa one-man committee-ko songaha.
Da·sikkario Boko-o donggipa damsa private godown-oniko chaljaprako kg 50 ong·gipa chalja laksa merongrangko Assam Police-ni ra·sekani ja·mano, a·selrangko namedake sandianiko dakchina gita A·dok Sorkari da·sikkari July 29 tariko ge·etaniko on·manahachim.