AITC, 2023-o sorkariko rikna M’laya-o pangchakaniko bilakbatatgen: Mukul

GUWAHATI: Meghalaya-o 2023 Assembly election-rangona AITC-ni ja·ku de·ani a·bachenga gadango manderangona sokna, bil-sasonona re·bana political party-rangni bidingo namedake tarina aro Meghalaya-ni manderangna cholgipin sorkariko on·a election-o chena nanggen ine chief minister gitcham aro All India Trinamool Congress (AITC) dilgipa Mukul Sangma mijalo aganaha.
“Political party ge·antian uamangni miksongtang-ja·ku de·ani dongna nanggen. AITC Meghalaya-na ja·ku de·ani a·bachenga gadangona chinga sokna aro political party-rangni kosako namedake tarina aro pilak rakgipa aro ra·bianirangni kosako chena nanggen….Chinga election-rango chena aro gitalgipa namroro-silroroanina Meghalaya-ni manderangna 2023-o cholgipin sorkariko on·a election-rangona nanggen,” Sangma, Assam Trinamool Congress-o gitalgipa memborrangni namngrime ong·atgipa programme-o aganaha.
AITC-ni ra·baani gipin political party-rangoni dingtanggen aro Meghalaya-o miksonggipa mangrakgipa pangchakaniko songgen jekon ra·bigiparangba pangpikna amjawa, AITC Meghalaya dilgipa aganaha.
“Chingni ra·baani party-ni bimingan “Trinamool” a·bachenga gadangrango party-ni dol gita pangchakaniko bilakbatatgen. Chinga kamoni kosakona sokatgen,” Sangma aganaha.
‘‘Ua Congress-ona re·angpilnaba donga ingipani gimin kobor on·timgiparang chanchichipe aganaia, jangbingbangatatna jotton ka·enga chongmotko chekna mongsonggipa ong·a, ua aganaha.
Sangma, Assam Trinamool Congress president Ripun Bora, AITC dilgiparang Mahua Moitra aro Sushmita Dev-maang AITC-ni Assam chapter-ko a·bachengatgipa programme-o dongpaha aro skanggipa bako komibeoba sak 60 gital memborrang napaha aro uamangoni bang·bataan Assam Congress-oni ong·a.
AITC, Tripura aro Meghalaya-o dongaha aro Assam unit-ko a·jolo party-ni ja·kolko sanna a·bachengaha.
“Ia gitalgipa unit-rang chingni ka·sagipa manderangna dangdike on·a aro naljokani donggijagipa a·songko ma·malekatgipa dolrangni kosako dakgrikan ia party-ko bilakbatatgen. Da·alo re·mikkangna chinga pangchakaniko songenga aro chingni manderangna dangdike on·ani daitoko mesokenga,” ua aganaha.
“Assam aro Meghalaya aro salgro-salramni gipin a·dokrang an·chingni man·rikrikgipa bilakani aro ra·bianirang donga…uarang a·jolni neng·nikanirang baksa bakrimpaani donga. Unigimin dingtang dingtang political party-rangni dilgiparangna ia bakrimaniko ma·sina namen mongsonggipa ong·a,” ua agandapaha.