SHILLONG: Adhoc skulrango skigiparangni dabianirangko a·dok sorkari niengkua ine a·dokni Chief Minister Conrad K Sangma parakataha.
Chief Minister-ni parakatani gitade, adhoc skigiparangni dabianirangko sorkari niengkua indiba skigiparangni dabianirangko chu·sokatanio tangka paisarangko bang·en nangdapengani gimin ia dabianirangko chu·sokataniara sorkarina altua kam ong·jaenga.
“Skigiparangni non-cooperation movement-ko dake jingjengatanina chinga suk ong·jaenga indiba skigiparangni dabianiko chu·sokatanio tangka paisarangko bang·en nangdapengani gimin ia chingna altua kam ong·jaenga,” ine Sangma aganaha.
Meghalaya a·dokni adhoc skulrango skigiparangna dormahako gong 18,000-chi bariatna aro 5 percent ka·e bilsio bariatchina dabianiko chu·sokatna gita a·dok sorkari, seachi ku·rachakaniko on·jaengani gimin Federation of All School Teachers of Meghalaya (FASTOM)-ni ning·o skigiparang, re·anggipa Sukrobar sal dipet Non-Cooperation Movement (NCM)-ko a·bachengatahachim.
Indake ong·engon, a·dokni dam 200 lower primary (LP) skul nokrangko rikna aro dam 1,800 skul nokrangko taridapna proposal on·aniko a·dok sorkari ra·chakmanaha ineba Chief Minister parakataha.
“Ia skul nokrangko rikanio aro taridapanio gong kror 170-mang koros ong·gen aro ia skul nokrangko namdapatna gita chinga dingtang dingtang cholrangchi tangka paisarangko on·gen,” ine Sangma aganaha.
