TURA: Adita salrangna skang drae til·eka man·gipa me·chikni parake on·anirangko ra·anio police-rang, kamtangko name ka·jaha ine chadamberangko dilgiparangoni saksa Rupa M Marak matnangataha.
Marak-ni parakatani gitade, drae til·ekako man·gipa me·chikni nokdangko ua Budbar salo grongenba sing·sandieon, Tura Police Station-ni me·chik police sakgittam, nanga gita dakchakanirangko on·ani pal batesa drae til·eka man·gipa me·chikko aro uni ma·a paako kragija dake sai intekesa roskaaha ine me·chikni nokdang, una parakataha.
Ia a·sel ong·aniko mikrontangchi nikgipa mandean sakkiko on·ahaoba police-rang, kal·aka man·gipa me·chik aro uni nokdangko kragija dake inteke roaha aro uko drae til·eka dongja ine me·chikkoba ku·rachakchina gita draaha ine me·chikni nokdang parakatahachim.
Koborko on·ani gitade, re·anggipa April-ni 20 tariko college-o poraienggipa bilsi 20-ni me·chik saksa noktangona re·angpilengmiting somoio, dos dakgipa mande uko sibokatenba drae til·ekahachim. Ia a·sel ong·aniko mande saksa mikrontangchi nikani ja·man, dos dakgipa mande, ua biapon an·tangni phone-ko gale ua biaponi katahachim. Iani ja·mano a·sel ong·aniko nikgipa mande, ia me·chikko nokona dilange doneaha aro ia me·chikni nokdang, dos dakgipa mandeni kosako FIR ka·doangahachim.
“Drae til·eka man·gipa me·chikko dakchakani pal iandake sinjete roaniara police-rangni namen kragija dakani ong·enga. Ia me·chik kal·akako man·e gisikni gita dongtogijaniko man·aha aro porikkakoba sena man·jaha. Uni gimin iandakgipa a·sel ong·anirango an·ching uamangna dakchakanirangkosa on·na nangchongmota,” ine Rupa Marak parakataha.
Ia me·chikko drae til·ekgipa mandeni kosako FIR ka·ani ja·man, police-rang ia me·chikni nokona re·ange sing·sandieani pal ia me·chikko aro uni nokdangkosa police station-ona okamatskaaha ineba ia me·chikni nokdang parakatahachim.
“Chinga police-rangni jako saia intekako man·e namen dongtojabeaha aro police station-ona okamattainaba kene dongengaha,” ine me·chikni pagipa parakataha.
Indake ong·engon, dos dakgipa mandeko police-rang rim·ahani gimin iandake me·chikko aro uni nokdangko saie inteke rona nangjachim aro niamko chu·sokatna on·na nangaiachim ineba Rupa parakataha.