TURA: Bristibar salo, All India Trinamool Congress (AITC)-ni state president Charles Pyngrope-ba, a·dokni official-rang baksa Rongjeng Model College-ni obostarangko nieaha.
Rongjeng Model College-ko nieani somoio Pyngrope baksa Education department-ni Additional Chief Secretary DP Wahlang, School Education & Literacy-ni Director Ambrose Ch Marak, East Garo Hills a·jani Deputy Commissioner Swapnil Tembe, jolni NGO-rang aro gipinrangba dongpaaha.
Rongjeng Model College-ko rikanirang namjani gimin Rongjeng jolo donggipa dingtang dingtang NGO-rang, chong·motan GSU, FKJGP, ASWA, ASCOR, AAYF aro GSMC dolrang jegalgrimtokahani gimin Bristibar salo, AITC-ni dilgipa aro sorkari official-rang, ia biapona re·bae college-ni obostarangko niangaha.
Ia model college-ko rikani namjani gimin Detailed Project Report (DPR)-o pangchake rikchina gita NGO-rang dabitokengachim.
Ia Model College-ko RUSA-ni ning·o gong kror 12-na batgipa korosrangchi rikengachim indiba college-ko rikanio kamrang namjani gimin jolni NGO-rang, ta·raken inquiry dakchina aro nanga gita ja·kurangko de·china dabie jingjengatanirangkoba dakangahachim.
Indake ong·engon, ia college-ko Bristibar salo sorkari official-rang re·bae niangahani gimin ia college-ko rikpiltaina gita sorkari ta·raken ja·kurangko de·chakatgen ine jolni NGO-rang, an·tangtangni ka·dongchakenganiko parakataha.
“Chinga bebera·a chingni dabigimin gita sorkari, ia college-ko rikani bidingo ta·raken ja·kurangko de·gen aro chingna ku·rachakgimin gita namgipa college-ko on·gen. Ian Rongjeng-o songdongenggipa manderangni jumang ong·a aro iako chu·sokatchina chinga nangnikenga,” ine Rongjeng-ni NGO-rang parakataha.
Official-rang baksa AITC-ni state president, Rongjeng Model College-ko niea
Date:
Share post:
